Planet për të lëshuar satelitë reflektues dhe deri në 1 milion anije shtesë në orbitën e ulët të Tokës mund të prishin gjumin e njerëzve, jetën e egër dhe ekosistemet, kanë paralajmëruar shkencëtarët.

“Shkalla e propozuar e vendosjes në orbitë do të përfaqësonte një ndryshim të rëndësishëm të mjedisit natyror të dritës së natës në një shkallë planetare”, thanë presidentët e katër shoqatave ndërkombëtare të kronobiologjisë, sipas The Guardian.

Charalambos Kyriacou, gjenetist në Universitetin e Leicesterit dhe president i Shoqatës Evropiane të Ritmeve Biologjike (EBRS), shtoi: “Po themi, ju lutem mendoni para se ta çoni përpara këtë, sepse kjo mund të ketë pasoja globale për gjëra si siguria ushqimore. Bimët kanë nevojë për natën. Nuk mund ta zhdukni atë”.

Reflect Orbital synon të drejtojë rrezet e diellit në zona prej 5 deri në 6 kilometrash “sipas kërkesës”, ndërsa kompania e Elon Musk, SpaceX, planifikon deri në 1 milion satelitë për një rrjet të fuqizuar nga energjia diellore dhe inteligjenca artificiale.

“Ndërsa ide si pasqyrat në satelitë që dërgojnë ‘dritë dielli sipas kërkesës’ … mund të tingëllojnë si fantashkencë, këto propozime janë shumë reale”, tha Ruskin Hartley nga DarkSky International.

Mirosllav Kocifaj nga Akademia Sllovake e Shkencave shtoi se reflektimet nga satelitët tashmë po rrisin ndriçimin e qiellit të natës dhe mund t’i afrohen kufijve të vendosur për ta ruajtur qiellin e errët deri në vitin 2035.

Tami Martino, drejtuese e Shoqatës Kanadeze të Kronobiologjisë, tha: “Sistemet cirkadiane janë të ndjeshme ndaj niveleve të dritës shumë më të ulëta se ato që njerëzit zakonisht i perceptojnë si të ndritshme. Nëse qielli i natës bëhet përgjithmonë më i ndritshëm, pasojat mund të përhapen nëpër ekosisteme në mënyra që ende nuk i kuptojmë plotësisht”.