Një delegacion nga Hamasi pritet të zhvillojë bisedime me ndërmjetësit egjiptianë në Kajro të dielën për të trajtuar shkeljet e pretenduara të armëpushimit në Gaza nga Izraeli, sipas dy zyrtarëve të grupit palestinez.

Pavarësisht armëpushimit që hyri në fuqi në tetor, lufta gjenocidale e Izraelit në Gaza ka vazhduar të destabilizojë territorin palestinez.

“Delegacioni do të takohet me zyrtarët egjiptianë të dielën në mëngjes për të diskutuar ndalimin e shkeljeve izraelite dhe zbatimin e dispozitave të mbetura të fazës së parë të marrëveshjes”, tha një zyrtar i Hamasit për AFP, duke folur në kushte anonimiteti pasi nuk ishte i autorizuar të fliste publikisht.

Sipas tij, Hamasi do të theksojë nevojën që Izraeli të ndalë të gjitha shkeljet e armëpushimit, të çmontojë pozicionet e tij ushtarake në Gaza, të rihapë plotësisht pikat kufitare, të rrisë fluksin e udhëtarëve dhe të lejojë hyrjen e sasive më të mëdha të ndihmave humanitare në territor.

Grupi gjithashtu pritet të kërkojë që një trup administrativ për Gazën, i krijuar nga SHBA dhe i përbërë nga teknokratë palestinezë, të hyjë në enklavë dhe të marrë përgjegjësitë qeverisëse.

Një zyrtar i dytë i Hamasit shtoi se delegacioni do të takohet gjithashtu me përfaqësues të fraksioneve të tjera palestineze në Kajro për të diskutuar këto çështje.

Në janar, Uashingtoni njoftoi se armëpushimi kishte kaluar në fazën e dytë sipas një plani paqeje të ndërmjetësuar nga Presidenti i ShBA-së, Donald Trump.

Kjo fazë parashikon çarmatimin e Hamasit dhe tërheqjen graduale të forcave izraelite nga Gaza.

Ajo gjithashtu parashikon krijimin e një force paqeruajtëse prej 20.000 trupash, të quajtur Forca Ndërkombëtare e Stabilizimit, për të cilën disa vende kanë premtuar trupa.

Hamasi thotë se nuk është kundër dorëzimit të një pjese të arsenalit të tij, por vetëm si pjesë e një procesi politik palestinez.

Të shtunën, agjencia e mbrojtjes civile në territor, e cila vepron si forcë shpëtimi, raportoi se sulmet ajrore izraelite vranë shtatë persona në një zonë veriore.

Ushtria izraelite tha se kishte goditur një “qelizë të armatosur terroriste”.

Ajo tha se militantët i ishin afruar asaj që njihet si “Vija e Verdhë”, kufiri de facto që ndan Gazën në dy zona: një nën kontrollin ushtarak izraelit dhe një nën kontrollin e Hamasit.

Të paktën 749 palestinezë janë vrarë që nga fillimi i armëpushimit, sipas ministrisë së Shëndetësisë në Gaza, shifrat e së cilës konsiderohen të besueshme nga Kombet e Bashkuara.

Ushtria izraelite ka raportuar pesë ushtarë të vrarë në Gaza që nga fillimi i armëpushimit.