Në Shqipëri ka filluar edicioni i parë i Festivalit Ndërkombëtar të Filmit për Studentë (International Student Film Festival in Tirana - ISFFT).

Ceremonia e hapjes së festivalit është mbajtur në sallën e koncerteve të Universitetit të Arteve me pjesëmarrjen e përfaqësuesve të institucioneve, studentëve, pedagogëve dhe artdashësve.

ISFFT-ja është një projekt i iniciuar nga Universiteti i Arteve i Shqipërisë. Festivali mbështetet nga Bashkia e Tiranës, Qendra Kombëtare e Kinematografisë e Shqipërisë dhe institucione të tjera.

Sipas organizatorëve, përveç shfaqjes së qindra filmave, festivali vjen edhe si një platformë akademike dhe profesionale që synon të lidhë arsimin e lartë artistik me industrinë e filmit, "duke krijuar një hapësirë të strukturuar për dialog rajonal dhe evropian".

Festivali zhvillohet në datat 21-24 prill me pjesëmarrje nga disa shtete nga rajoni dhe më gjerë dhe synohet gjithashtu që me anë të tij Tirana të përfshihet në hartën ndërkombëtare të festivaleve të filmit për studentë.

Sipas organizatorëve, misioni i ISFFT-së është të ndërtojë një platformë bashkëkohore ku ndërthuren arsimi universitar, praktika filmike dhe dialogu kulturor.