Panairi shumë i pritur "GITEX AI Turkiye" vazhdoi me ditën e dytë në Istanbul, ndërsa liderët globalë të teknologjisë, investitorët dhe startup-et eksploruan mundësitë kryesore të inteligjencës artificiale (IA) dhe partneritetet strategjike.
Eventi global, i organizuar nga Zyra e Investimeve e Presidencës së Republikës së Türkiyes dhe Ministria e Industrisë dhe Teknologjisë, hapi dyert të mërkurën në Qendrën e Ekspozitave të Istanbul. Agjencia Anadolu vepron si partneri global i komunikimit për eventin ku startup-et, investitorët dhe gjigantët e teknologjisë u mblodhën për t'u zgjeruar në tregje të reja dhe për të zhvilluar bashkëpunime.
Drejtori i Departamentit të Komunikimit të Zyrës së Investimeve, Gokhan Yucel dhe zëvendëspresidenti i GITEX-it, Bilal Alrais, mbajtën fjalimet hapëse në ditën e parë. Një panel i titulluar "Numërimi Mbrapsht 1GW" diskutoi strategjinë e IA-së të Türkiyes për të arritur të paktën një gigavat kapacitet të instaluar të qendrës së të dhënave deri në vitin 2030.
Pjesëmarrësit vlerësuan modelet e nevojshme të zbatimit për ta transformuar këtë objektiv në kapacitet operativ informatik, duke adresuar rreziqet si proceset e lejeve dhe oraret e lidhjes me rrjetin. Folësit eksploruan se si IA-ja e ndërmarrjeve do të formësojë të ardhmen përtej vitit 2027 dhe si udhëheqësit mund të përgatiten për këtë transformim masiv dixhital.
Kreu i Dhomës së Industrisë së Istanbulit, Erdal Bahcivan, gjatë fjalimit të tij vuri në dyshim nëse versionet aktuale të ndërmarrjeve mund të përballojnë botën reale të inteligjencës artificiale. Kryetarja e Bordit të administratorëve të Fondacionit për Gratë dhe Demokracinë, Sumeyye Erdoğan Bayraktar, mori pjesë në një sesion të fokusuar te gratë, lidershipi dhe inovacioni i përqendruar te njeriu në epokën digjitale.
Një panel tjetër u përqendrua te fabrikat inteligjente, duke vlerësuar kalimin nga aplikacionet e hershme pilot në përdorimin e inteligjencës artificiale të shkallëzueshme në linjat e prodhimit, kontrollin e cilësisë dhe planifikimin. Ekspertët diskutuan se si agjentët e automatizuar riformësojnë operacionet e korporatave në të gjithë shërbimin ndaj klientit, financat dhe burimet njerëzore, duke theksuar masat e nevojshme të sigurisë dhe qeverisjes.
Një sesion mbi përshpejtimin e transformimit të shitjes me pakicë mbuloi integrimin e sistemeve inteligjente në operacionet globale të shitjes me pakicë dhe ofrimin e përvojave të personalizuara të tregtisë elektronike në kohë reale.
Dita e parë përfundoi me një panel mbi ndërtimin e një ekosistemi, ku morën pjesë drejtori i TÜBİTAK ULAKBIM, Mehmet Mirat Satoğlu, drejtuesja e projektit "BSC AI Factory Turkiye", Feyza Eryol dhe drejtori i Institutit AI TÜBİTAK BILGEM, Mehmet Haklidir.
Eventi pret 24 kompani në kuadër të Programit Turcorn 100, i cili synon të çojë kompanitë unicorn dhe ato në fazën e rritjes së Türkiyes në tregjet ndërkombëtare. Gjigantët globalë të teknologjisë, përfshirë Google Cloud, HPE, NVIDIA, ASUS, Dell Technologies, Huawei, SAP dhe TrendAI, gjithashtu marrin pjesë në ekspozitën masive.
