Presidenti amerikan, Donald Trump, deklaroi se të gjitha minat në ujërat ndërkombëtare të Ngushticës së Hormuzit janë shpërthyer ose hequr dhe se Irani është paralajmëruar se çdo anije që vendos mina të reja do të shkatërrohet.

Në një postim në Truth Social të martën, Trump tha se Shtetet e Bashkuara, përmes Forcës së tyre Hapësinore, po mbikëqyrnin “çdo centimetër katror” të Ngushticës, një rrugë ujore kyç për zinxhirin global të furnizimit me energji.

“Politika e tolerancës zero ndaj vendosjes së minave është plotësisht në fuqi dhe po zbatohet”, tha Trump.

ShBA-ja dhe Irani prej javësh nuk kanë kryer sulme ajrore ndaj forcave ushtarake të njëra-tjetrës, por sulmet ndaj anijeve në Ngushticën e Hormuzit kanë vazhduar, ndërsa të dyja palët rivalizojnë për kontrollin e kalimit të ngushtë detar.

Të hënën, përmes ngushticës kaluan pesë milionë fuçi nafte në ditë, sipas të dhënave paraprake të platformës së gjurmimit të anijeve Vortexa. Kjo shifër ishte më e ulët se mbi 20 milionë fuçi në ditë përpara luftës, sasi që përbënte rreth një në çdo pesë fuçi të konsumuara në mbarë botën.

Irani dhe Omani diskutojnë një kornizë

Ndërkohë, ministrat e Jashtëm të Iranit dhe Omanit thanë se kishin diskutuar një kornizë për krijimin e një korridori të përkohshëm përmes Ngushticës së Hormuzit dhe një projekt për çminimin e rrugës ujore, me të cilën kufizohen të dyja vendet.

Të dyja vendet kanë kërkuar të rregullojnë kalimin përmes Ngushticës së Hormuzit, siç parashikohet në memorandumin e mirëkuptimit ndërmjet ShBA-së dhe Iranit, pasi rruga ujore u shndërrua në një vatër tensioni të luftës në Lindjen e Mesme.

Ministri i Jashtëm i Omanit, Badr al-Busaidi, dhe ministri i Jashtëm i Iranit, Abbas Araghchi, “diskutuan një kornizë me faza, e cila mund të ofrojë një bazë praktike dhe të zbatueshme për të ecur përpara” gjatë bisedimeve në Teheran, thuhet në një deklaratë të përbashkët të publikuar nga Omani.

Korniza “përfshin krijimin e një korridori të përbashkët dhe të përkohshëm lundrimi përmes Ngushticës së Hormuzit, si dhe një marrëveshje për zbatimin e një projekti të përbashkët për çminimin e Ngushticës”, shtohet në deklaratë.

Negociatat teknike do të vazhdojnë për të gjetur një “korridor të përhershëm lundrimi dhe për ta përcaktuar administrimin e ardhshëm të Ngushticës, si dhe një mekanizëm për shkëmbimin e informacionit, menaxhimin e trafikut dhe ofrimin e shërbimeve përkatëse të lundrimit dhe sigurisë”, thuhet më tej.

Të dyja palët theksuan rëndësinë e zhvillimit të diskutimeve të përbashkëta me shtetet që kufizohen me ujërat e Gjirit.