Papa Leoni XIV, kreu i Kishës Romakatolike, filloi vizitën shtatëditore në Spanjë, gjatë së cilës do t'i drejtohet parlamentit, do të drejtojë tubime të mëdha fetare dhe do të përcjellë mesazhe paqeje për Lindjen e Mesme, tolerancës dhe luftës kundër urrejtjes ndaj migrantëve.

Kjo vizitë vjen në një moment tensionesh të shtuar politike dhe masash të larta sigurie në të gjithë vendin.

Papën Leo, është papa i parë që viziton Spanjën në 15 vitet e fundit. Ai u prit në aeroportin e Madridit "Barajas Adolfo Suarez" nga mbreti Felipe VI dhe kryeministri Pedro Sanchez.

Në kuadër të programit, Papa Leo do të qëndrojë në Madrid deri më 9 qershor, pas së cilës do të vizitojë Barcelonën (9-10 qershor), si dhe Gran Canarian (11 qershor) dhe Tenerifën (12 qershor) në Ishujt Kanariakë.

Edhe pse programi i papës në Spanjë ka rëndësi të madhe për besimtarët katolikë, mesazhet politike që do të përcjellë kreu i shtetit të Vatikanit do të jenë gjithashtu të spikatura.

Papa Leu do të jetë papi i parë që do t'i drejtohet parlamentit spanjoll më 8 qershor.

Pritet që Papa, i kritikuar kohët e fundit nga Presidenti amerikan Donald Trump, të përcjellë mesazhe paqeje për Lindjen e Mesme në parlamentin spanjoll, në përputhje me politikën e qeverisë spanjolle për njohjen zyrtare të shtetit palestinez, vendosjen e sanksioneve ndaj Izraelit dhe këmbënguljen për zgjidhjen me dy shtete. Pritet gjithashtu të bëjë thirrje për tolerancë kundër polarizimit dhe urrejtjes ndaj migrantëve.

Vizita e papës në Ishujt Kanariakë, ku do të takohet me migrantë pa status të rregulluar dhe ku do ta shoqërojë kryeministri Pedro Sanchez, duhet të dërgojë një mesazh të qartë liderëve politikë evropianë për nevojën e mbështetjes më të madhe ndaj migrantëve.

Programi i udhëheqësit shpirtëror katolik në Spanjë përfshin, nga pikëpamja fetare, meshën e së dielës që do të drejtojë në sheshin Piazza del Cibeles të Madridit më 7 qershor, ku pritet të marrin pjesë një milion njerëz, si dhe vizitën në baziliken e famshme Sagrada Familia në Barcelonë më 10 qershor.

Vizita përkoin me 100-vjetorin e vdekjes së Antoni Gaudít, arkitektit që krijoi Sagrada Familianë. 

Për shkak të vizitës së Papës Leon, trafiku urban është mbyllur plotësisht, veçanërisht në Madrid dhe Barcelonë, dhe qytetarët ftohen të përdorin transportin publik.

Ministria e Brendshme njoftoi se në të gjitha qytetet ku do të jetë i pranishëm Papa është shpallur niveli i alarmit 4 për të garantuar sigurinë e tij, dronët janë ndaluar dhe janë vendosur mbi 15.000 efektivë të personelit të sigurisë.

Konferenca e Ipeshkvijve Spanjollë dhe institucionet e përfshira në organizimin e vizitës njoftuan se vizita e Papës Leon në Spanjë ka kushtuar rreth 25 milionë euro.

Shpenzimet janë mbuluar nga donacionet e institucioneve dhe individëve privatë, si dhe nga fondet e autoriteteve të Madridit, Katalonisë dhe Ishujve Kanariakë.

Sipas statistikave në Spanjë, përqindja e njerëzve që identifikohen si katolikë ka rënë nga rreth 90 për qind në 55 për qind të popullsisë gjatë 50 viteve të fundit.

Në vitet e fundit, veçanërisht me rritjen e imigracionit, numri i myslimanëve në Spanjë u afrua në tre milionë, duke arritur pesë për qind të popullsisë totale.