УЕФА покрена дисциплинска постапка против белградскиот клуб Црвена ѕвезда откако навивачите истакнаа транспарент во чест на осудениот воен злосторник Ратко Младиќ за време на натпреварот од Лигата на Европа, објави во петокот „The Athletic“.
Белградскиот клуб на своите официјални профили на социјалните мрежи објави фотографии на кои се гледа како навивачите за време на реванш-натпреварот од плеј-офот на Лигата на Европа на УЕФА против Викторија Плзењ во Чешка држат транспарент на кој пишувало: „Генерале, вечна слава и благодарност“.
За време на натпреварот се слушнало и скандирање на името на Младиќ.
Европската фудбалска унија соопшти за „The Athletic“ дека постапката е покрената поради „расистичко и/или дискриминаторско однесување“ и „пренесување порака која не е соодветна за спортски настан“.
Клубот е обвинет и за несоодветно однесување на тимот поради дисциплински прекршоци за време на натпреварот, откако добил седум жолти и еден црвен картон.
Младиќ почина во четвртокот на 84-годишна возраст, додека ја издржуваше доживотната затворска казна во Хаг.
Во јуни 2021 година, Механизмот на Обединетите нации за меѓународни кривични трибунали ја потврди неговата доживотна казна за геноцид, злосторства против човештвото и воени злосторства извршени за време на војната во Босна и Херцеговина од 1992 до 1995 година.
Повеќе од 8.000 Бошњаци, мажи и момчиња, биле убиени во Сребреница во јули 1995 година во масакрот што меѓународните судови го квалификувале како геноцид.
Меморијалниот центар Сребреница во петокот претходно соопшти дека поднел официјална пријава до УЕФА поради транспарентот и последователното објавување на фотографиите на официјалните канали на клубот на социјалните мрежи.
„Клубот кој свесно ги користи своите официјални комуникациски канали за ширење пораки со кои се велича човек правосилно осуден за геноцид, не може таквото однесување да го сведе на однесување на навивачите. Ова повеќе не е само прашање на трибините, туку на институционалниот однос на клубот кон вредностите врз кои УЕФА го темели европскиот фудбал“, соопшти Меморијалниот центар Сребреница.
Црвена ѕвезда претходно беше казнета поради оддавање почит кон Младиќ за време на натпреварот од Лигата на Европа против БАТЕ Борисов во ноември 2017 година.
Навивачите го скандирале името на Младиќ и истакнале транспарент со кој му изразиле поддршка за време на натпреварот во Белорусија, кој завршил без голови, еден ден откако трибуналот на ОН го осудил на доживотен затвор за геноцид, злосторства против човештвото и воени злосторства.
Во јануари 2018 година, Контролното, етичкото и дисциплинското тело на УЕФА ѝ наредило на Црвена ѕвезда домашниот натпревар од шеснаесеттинафиналето на Лигата на Европа против ЦСКА Москва да го одигра пред празни трибини, а на клубот му изрекло и парична казна од 50.000 евра (58.300 долари).
По жалбата, УЕФА ја одложила забраната за одигрување натпревари пред публика и го ставила клубот во двегодишен условен период. Паричната казна била намалена на 30.000 евра (35.000 долари).
Според наводите на Меморијалниот центар, УЕФА во претходната постапка заклучила дека величањето на Младиќ претставува не само поддршка за поединец, туку и порака со која се навредуваат жртвите врз етничка и верска основа.
Центарот оцени дека најновиот случај е посериозен бидејќи Црвена ѕвезда дополнително ги проширила таквите пораки објавувајќи ги преку своите официјални комуникациски канали.
