Штрајкот на вработените во Загрепскиот електричен трамвај (ЗЕТ) и Загрепски холдинг доведе до целосен прекин на јавниот превоз и до сериозни тешкотии во собирањето на отпадот во хрватскиот главен град.
Вработените во ЗЕТ стапија во штрајк вчера 3:30 часот наутро, што предизвика прекин на трамвајскиот и автобускиот сообраќај во главниот и најголем град во Хрватска.
Поради штрајкот, трамваите и автобусите на ЗЕТ не сообраќаат низ Загреб, а на градските улици и на постојките се забележува метеж поради прекинот на јавниот превоз.
Штрајкот беше организиран од синдикатите на вработените во ЗЕТ, како и од синдикалните претставници на „Чистота“, која во моментов врши само минимално неопходно собирање отпад на локации, како што се болници и градинки.
Синдикалните претставници бараат зголемување на платите, иако просечната плата на возач во ЗЕТ изнесува 1.992 евра, а вработените во „Чистота“ заработуваат во просек 1.651 евро.
Беа избегнати големи сообраќајни проблеми бидејќи граѓаните се организираа сами на сопствена иницијатива и како одговор на повикот на градоначалникот.
За време на штрајкот во градот сообраќаат само два трамваја и еден автобус.
Градоначалникот на Загреб, Томислав Томашевиќ, повторно ги повика граѓаните да користат автомобили што е можно помалку. Тој рече дека понудата на Градот до работниците останува на маса, додека одлуките на судот за легалноста на штрајкот се очекуваат утре.
Тој исто така нагласи дека основните услуги, особено превозот до болниците, мора да се обезбедат за да не се загрози здравјето и безбедноста на граѓаните со штрајкот.
Тој им се обрати и на работниците на ЗЕТ и Холдинг, нагласувајќи дека понудата на Градот останува на маса и дека ги задржува сите тековни права од колективниот договор.
„Сите тековни права остануваат, а тоа вклучува зголемување на платите од 4,5% од 1 септември, ретроактивно, и уште едно зголемување од 1 јануари поврзано со инфлацијата, која според сегашните проценки исто така треба да биде околу 4,5%“, рече тој.
Тој додаде дека Градот е посветен и на понатамошно индексирање на платите во согласност со зголемувањето на цените.
