Министерствата за одбрана на Грција и Израел денес во Атина потпишале договор за набавка на израелски ракетни артилериски системи ПУЛС за грчката армија, во вредност од околу 758 милиони американски долари, објави израелското Министерство за одбрана.

Вредноста на договорот е околу 2,3 милијарди израелски шекели, или приближно 757,8 милиони долари, според Тајмс оф Израел.

Израелското Министерство за одбрана изјави дека овој договор е дел од стратегијата за проширување на извозот на одбранбената индустрија, со цел зајакнување на капацитетите на израелската војска, унапредување на политичките цели и поддршка на економијата.

Системот ПУЛС, произведен од израелската компанија Елбит, има дострел до 300 километри.

Договорот предвидува производство на одредени компоненти во Грција, а како што е најавено, спроведувањето на договорот ќе трае четири години, по што ќе следи десетгодишен период на поддршка и одржување.

Грција и Израел развија економски и дипломатски односи, во последните години одржаа неколку заеднички воени вежби, а во јужна Грција работи и центар за обука на пилоти, објаснува израелскиот портал.

Грција, исто така, преговара со Израел за развој на противвоздушен и противракетен систем вреден околу три милијарди евра.