Неколку израелски министри повикаа на продолжување на воената офанзива во Појасот Газа и на отфрлање на утврдената Мапа на патот за спроведување на втората фаза од планот за прекин на огнот на американскиот претседател Доналд Трамп, објавија денес израелските медиуми.

Повиците биле упатени на седницата на израелскиот Кабинет за безбедност, со која претседавал премиерот Бенјамин Нетанјаху синоќа, а на која се разгледувала Мапата на патот за втората фаза од планот, објави весникот „Израел хајом“.

Според весникот, министрите Зеев Елкин, Безалел Смотрич, Орит Строк и Ави Дихтер побарале обновување на воените операции во Газа.

„Доколку Израел не започне офанзивни операции во рок од две недели, тоа ќе значи дека го прифатил планот“, изјавил Елкин, повикувајќи на официјално отфрлање на одредбите од Мапата на патот.

Смотрич, Строк и Дихтер, исто така, побарале Нетанјаху јавно да потврди дека Израел се спротивставува на спроведувањето на втората фаза од планот.

„Добар сте во маневрирањето, но по издавањето на официјален документ, мора да го делегитимираме. Не можеме бесконечно да продолжиме со маневрирање“, му рекол Смотрич на Нетанјаху.

„Хамас не смее да остане. Мора да биде избришан“, додал тој.

Откако договорот за прекин на огнот стапи на сила на 10 октомври 2025 година, Израел продолжи да го крши договорот преку секојдневни напади врз Газа, при што загинаа 1.252 Палестинци, а други 4.120 беа повредени, повеќето од нив жени и деца.

Минатиот петок, Одборот за мир, со кој претседава американскиот претседател Доналд Трамп, соопшти дека Хамас ја одобрил Мапата на патот, додека Израел сѐ уште ја разгледува својата позиција.

Советот тогаш објави нацрт-договор со принципите и механизмите за спроведување на следната фаза од планот за Газа, кој опфаќа безбедносни, административни и преодни аранжмани за енклавата, како и предложен политички процес.

Израелската Армија моментално окупира околу 70 % од Појасот Газа по геноцидната војна во која од октомври 2023 година загинаа повеќе од 73.000 Палестинци, а над 174.000 се повредени, според палестинските бројки.