Американскиот претседател Доналд Трамп изјави дека иранските власти сакаат да постигнат договор со Вашингтон и дека „не сакаат да бидат нападнати“, по повеќемесечната ескалација на тензиите на Блискиот Исток.

„Очигледно е дека не сакаат да бидат нападнати. Сакаат да постигнат договор. Ќе видиме“, изјави Трамп во интервју за „Панчбоул њуз“ објавено денес.

Претседателот на иранскиот парламент и главен преговарач во разговорите со САД, Мохамад Багер Галибаф, пак, претходно денеска го критикуваше она што го опиша како „театарска дипломатија во јамка“, осврнувајќи се на моделот на најавување напади од страна на претседателот Доналд Трамп, а подоцна и нивното откажување.

Галибаф рече дека употребата на малтретирање, прекршени ветувања и лажни вести претставува „неуспешна стратегија“.

„Признајте ги фактите и исполнете ги вашите обврски. Не ни треба повеќе театар“, додаде тој.

Трамп во четврток изјави дека е „вклучен“ во преговорите за повторно отворање на Ормускиот Теснец и посочи дека наскоро би можел да се постигне договор.

Вашингтон и Техеран на 18 јуни потпишаа рамковен договор и започнаа преговори за постигнување конечен договор, но имаше застој во преговорите поради несогласувања околу безбедносните гаранции и непреченото пловење низ Ормускиот Теснец.

Тензиите повторно ескалираа минатиот месец, откако САД извршија нови напади на територијата на Иран, по што Техеран возврати со напади низ регионот, вклучително и во Јордан, Бахреин и Кувајт.

Трамп минатата недела се закани дека ќе го удри Иран „многу силно“, предупредувајќи дека може да ги таргетира енергетските објекти, мостовите и електраните. Подоцна рече дека ги прекинал нападите бидејќи Иран се согласил да ги обнови разговорите.

Според повеќе американски медиуми, исцрпените залихи на пресретнувачи, исто така, влијаеле врз неговата одлука да се воздржи од дополнителни напади врз Иран.

Трамп вчера изјави дека преговорите со Иран напредуваат добро и дека наскоро би можело да биде постигнат договор.