Францускиот претседател Емануел Макрон денес повика на градење нов светски поредок и предупреди дека не смее да се остане „пасивен“ во време на, како што го опиша, сè поголемиот глобален неред.

За време на обраќањето пред студентите на Универзитетот „Јонсеи“ во рамките на посетата на Јужна Кореја, Макрон истакна дека децениската стабилност и воспоставените норми сега се „разнишани“.

„Со децении имавме таканаречена стабилност заснована врз овој меѓународен поредок и неколку уверувања што ги имавме; сега сè е разнишано. Не смееме да бидеме само пасивни набљудувачи во овој нов неред. Мора да изградиме нов поредок“, изјави тој.

Макрон се заложи за систем заснован врз соработка меѓу „способните и подготвени земји“ што поддржуваат една, како што ја нарече, „коалиција на независноста“.

„Сметам дека наша цел не е да бидеме подредени на две хегемонистички сили“, рече тој, мислејќи на Кина и Соединетите Американски Држави.

Тој додаде дека земјите треба да избегнуваат зависност од кинеската „доминација“, но и изложеност на она што го нарече американска „непредвидливост“.

Макрон, исто така, ја нагласи важноста на обновена меѓународна соработка, особено во областа на истражувањето и науката.

„Она што го искусивме во последните неколку години е еден вид фрагментација на таа соработка. Некои земји почнаа да блокираат одредени заеднички иницијативи“, истакна францускиот претседател.

Тој додаде дека одредени држави почнале да ги кратат средствата во клучните области, нарекувајќи го тоа „предавство на духот на координацијата и соработката што ни е потребна“.

„Затоа, некое време треба да престанеме со натпреварувањето и да кажеме како да го изградиме вистинскиот компромис и да работиме заедно“, заклучи Макрон.