Во Скопје се одржа протест на студенти кои побараа правосудниот испит да се полага и на албански јазик.

Протестот започна од плоштадот „Филип II“, каде студентите со различни транспаренти побараа, како што рекоа, „правда“.

„Закон на хартија, дискриминација во пракса“, „Не негирајте стекнато право“, „Почитувајте го Законот за јазиците“, „Стоп за институционалната дискриминација“ – беа дел од транспарентите што ги носеа студентите.

Протестот потоа продолжи со марш преку Камениот мост до пред Министерството за правда.

Студентите побараа оставка од министерот за правда Игор Филков, кој изјави дека нема да дозволи правосудниот испит да се одржува на албански јазик.

„Нашето барање е едноставно – почитувајте го Уставот и законот, ништо повеќе, ништо помалку. Нашите колеги имаат право да го полагаат правосудниот испит на албански јазик. Секое одолговлекување е обид да ни се ускрати право што ни е одземано со години“, изјави студентот Бесар Сејдиу, претседател на Студентскиот парламент на Универзитетот „Мајка Тереза“.

Владата формираше група уставни експерти кои работат на решение

Премиерот на Северна Македонија, Христијан Мицкоски, претходно изјави дека како влада формирале група уставни експерти кои работат на решение кое ќе биде уставно и во согласност со меѓународните стандарди.

Министерството за правда соопшти дека правосудниот испит не може да се одржува на албански јазик, и покрај Законот за употреба на јазиците.

Законот за употреба на јазиците беше донесен во 2018 година и предвидува во сите органи на државната власт, покрај македонскиот јазик и неговото писмо, службен јазик да биде и јазикот што го зборуваат 20 проценти од граѓаните на земјата и неговото писмо, во овој случај албанскиот јазик.