Ерменскиот премиер Никол Пашинјан денес изрази уверување дека Ерменија и Туркије „во блиска иднина“ ќе воспостават дипломатски односи, јавува Анадолу.
Говорејќи на Светскиот ерменски самит во 2026 година, Пашинјан рече дека е уверен оти односите ќе бидат воспоставени врз основа на заемно признавање на територијалниот интегритет, суверенитетот и границите на двете земји.
„Ерменија и Туркије сè уште немаат воспоставено дипломатски односи, но уверен сум дека тие ќе бидат воспоставени во блиска иднина, врз основа на заемното признавање на територијалниот интегритет, суверенитетот и границите“, Пашинјан беше цитиран од државната новинска агенција „Арменпрес“.
„И верувам дека тоа е факт што мора да го признаеме“, додаде тој.
Туркије и Ерменија немаат дипломатски односи, а нивната копнена граница е затворена од 1993 година.
Двете земји започнаа процес на нормализација кон крајот на 2021 година, именувајќи го пензионираниот турски амбасадор Сердар Килич и заменик-претседателот на ерменскиот Парламент Рубен Рубињан за специјални пратеници.
За време на средбата на маргините на Генералното собрание на ОН во Њујорк во септември, турскиот претседател Реџеп Таип Ердоган и Пашинјан разговараа за унапредување на процесот на нормализација, зајакнување на трговските и економските врски и подобрување на регионалните транспортни врски.
За време на средбата, Ердоган го покани Пашинјан да учествува на Самитот на лидерите во рамки на КОП31 во Туркије. Пашинјан ја прифати поканата.
