Парагвајскиот претседател Сантијаго Пења поднесе оставка, додека се засилуваа барањата за негово отповикување по колапсот на дигиталниот заемодавач „уено“ (ueno), поради што милиони клиенти останаа без пристап до своите сметки.

„Ова го правам имајќи ја предвид стабилноста на нашата земја, социјалниот мир и потребата да се зачуваат нашите демократски институции“, изјави тој во видео-обраќањето во четвртокот.

Пења, сојузник на американскиот претседател Доналд Трамп, се повлекува од функцијата откако опозицијата свика вонредна седница за да започне постапка за негово отповикување во Конгресот, а демонстрантите побараа негова оставка.

Претходно во четвртокот, Пења ја изгуби поддршката од членовите на сопствената конзервативна партија. На негово место треба да дојде потпретседателот Педро Алијана.

Пратениците го обвинија Пења за судир на интереси, злоупотреба на пензиските фондови и институционално прикривање поврзано со колапсот на „уено“. Оваа институција брзо прерасна од финтек-играч во банка од средна големина, која управуваше со јавни средства во вредност од речиси 850 милиони долари.

„Моја најголема желба е да се гарантира враќањето на тие средства, Фондот за гарантирање на депозити да ја исполни својата цел, а јавните средства, како и ресурсите што им припаѓаат на сите Парагвајци, да бидат заштитени“, додаде Пења во своето обраќање.

Централната банка на Парагвај интервенираше во „уено“ откако утврдила дека се прекршени минималните барања за солвентност.

Ова предизвика криза поради која околу 3 милиони клиенти на компанијата, во земја со 6,5 милиони жители, останаа без пристап до своите сметки.

„Ueno“ сè уште нема дадено јавна изјава во врска со овој случај.