Израелскиот опозициски лидер Гади Ајзенкот се очекува да добие поддршка од 67 пратеници, што претставува мнозинство во Кнесетот со 120 места, откако арапската Заедничка листа денес соопшти дека ќе го поддржи за мандатар за состав на новата влада, објави „Јнет“.

Заедничката листа соопшти дека подоцна во текот на денот официјално ќе го извести претседателот Исак Херцог за одлуката да го предложи Ајзенкот, лидерот на партијата Јашар, за време на консултациите за тоа кому да му биде доверен мандатот за формирање влада.

„Одлучивме да го поддржиме Гади Ајзенкот“, соопшти Заедничката листа.

„До оваа одлука дојдовме едногласно, по консултациите меѓу партиите што ја сочинуваат Заедничката листа. Одлуката не беше лесна“, се додава во соопштението.

„И покрај нашата решеност да го смениме Нетанјаху, опозицискиот блок предводен од Ајзенкот сè уште не покажа подготвеност да им се спротивстави на политиките на Нетанјаху, да се бори против поттикнувањето омраза кон арапските граѓани и да ги оспори обидите за поткопување на легитимноста на нивните политички избори“, се наведува во соопштението на Заедничката листа.

Откако 11 пратеници на Заедничката листа официјално ќе ја достават својата препорака, се очекува Ајзенкот да има поддршка од вкупно 67 пратеници, со што ќе го надмине прагот од 61 место потребно за мнозинство во Кнесетот.

На изборите одржани на 27 октомври блокот на премиерот Бенјамин Нетанјаху освои 53 места додека еврејските опозициски партии обезбедија 48, а партиите предводени од Арапи освоија 19 места.

Партијата Раам, која има осум пратенички места, претходно веќе ја најави својата поддршка за Ајзенкот.

Препораките, сами по себе, не претставуваат владејачка коалиција, но Херцог ги зема предвид при одлучувањето на кој пратеник ќе му го довери мандатот за состав на влада.

Опозициските партии, исто така, се согласија да ги координираат напорите за формирање нова влада и да започнат преговори за политичките насоки и коалициските договори.