Бугарија денеска примила повик за помош од товарен брод што тонел во нејзината ексклузивна економска зона во Црното Море, соопшти бугарското Министерството за транспорт.
Два бугарски, еден романски и еден турски брод веднаш биле упатени кон местото на настанот, се додава во соопштението.
Бродот „Бетул 8“, кој пловел под сомалиско знаме и на кој имало 12 членови на екипажот, превезувал три тони пченица и пловел од Романија кон Египет.
Сите членови на екипажот на товарниот брод се спасени и се во добра општа состојба, без тешки повреди, но премрзнати, соопшти министерство за транспорт.
Морнарите биле качени во хеликоптер и пренесени кон поморската воздухопловна база „Чајка“, каде што биле организирани екипи за нивен прием и медицинска помош. При воздушниот преглед било утврдено дека бродот е превртен.
Причината за инцидентот не е јасна, но во изминатите неколку недели имаше низа смртоносни напади со беспилотни летала врз бродови во близина на бреговите на Бугарија и Романија, за кои се верува дека се поврзани со војната во Украина.
Романскиот премиер Лука Никулеску во неделата изјави дека беспилотни летала нападнале три трговски брода во Црното Море, во близина на романскиот Сулински канал.
Тој додаде дека романските одбранбени сили двапати кренале борбени авиони.
Романскиот министер за надворешни работи Дан Некулаеску во понеделник во Брисел изјави дека Романија ќе побара од своите партнери од Европската Унија да продолжат да обезбедуваат воени капацитети и да ја зајакнат координацијата со НАТО по нападите врз трговските бродови.
„Во последните 24 часа регистриравме четири аларми за беспилотни летала, а во текот на викендот беа погодени три брода. Ова е неприфатливо“, рече Некулаеску на редовниот месечен состанок на министрите за надворешни работи на ЕУ во Брисел.
Тој најави дека ќе побара од своите европски колеги да продолжат да придонесуваат за воените капацитети на Романија, како и за подобра координација меѓу Европската Унија и НАТО во врска со безбедносната состојба во Црното Море.






















