Регулаторната комисија за енергетика денеска донесе нова одлука со која се зголемуваат малопродажните цени на нафтените деривати во просек за 1,47 отсто во однос на претходната одлука од 29 јуни.

Според новата одлука, цената на ЕУРОСУПЕР БС-95 изнесува 85,50 денари за литар, додека ЕУРОСУПЕР БС-98 ќе се продава по 87,50 денари за литар.

ЕУРОДИЗЕЛ БС (Д-Е V) поскапува за 2,50 денари и новата цена изнесува 82,50 денари за литар. Екстра лесното масло за домаќинство (ЕЛ-1) поскапува за 2,00 денари и ќе чини 81,50 денари за литар.

Кај мазутот М-1 НС има мало намалување, па новата цена изнесува 41,230 денари за килограм, што е за 0,265 денари помалку од претходно.

Во образложението на одлуката, РКЕ наведува дека на светскиот пазар е регистриран раст на референтните цени кај бензините, дизелот и екстра лесното масло, додека кај мазутот има благо намалување. Влијание врз пресметката имал и курсот на денарот во однос на американскиот долар, кој во анализираниот период бил повисок за 1,5132 проценти.

Со новата пресметка, бензинот ЕУРОСУПЕР БС-95 поскапува од 84,50 на 85,50 денари, ЕУРОСУПЕР БС-98 од 86,50 на 87,50 денари, дизелот од 80,00 на 82,50 денари, а ЕЛ-1 од 79,50 на 81,50 денари.

Премиерот Христијан Мицкоски вчера најави дека од утре се очекува ново зголемување на цените на горивата, како последица на растот на цената на суровата нафта на светските берзи.

Мицкоски објасни дека корекцијата на цените е резултат на глобалните движења на пазарот, при што цената на суровата нафта во изминатите денови пораснала за околу пет до шест проценти, а поскапување е забележано и кај бензините на светските берзи.

И покрај најавеното зголемување, премиерот порача дека Македонија и понатаму има едни од најниските цени на горивата во регионот и дека Владата внимателно ги следи состојбите на енергетскиот пазар.