Германија и Шпанија се главните противници на плановите на Европската комисија да им забрани на кинеските добавувачи на технологија како што се Хуавеи и ЗТE пристап до европските телекомуникациски мрежи преку нови правила за сајбер безбедност.

Според анонимни извори запознаени со преговорите, Берлин и Мадрид сакаат земјите-членки да ја задржат контролата врз одлуките за телекомуникациската инфраструктура и предупредуваат дека забраната за опрема од кинеските компании на ниво на ЕУ би можела да предизвика одговор од Кина, објавува Блумберг.

Функционерите од двете земји, исто така, веруваат дека отстранувањето на кинеската опрема би можело значително да ги зголеми трошоците за развој на инфраструктурата за вештачка интелигенција во Европа.

Европската комисија ги означи кинеските компании Хуавеи и ЗТE како „добавувачи со висок ризик“ за телекомуникациски мрежи и ги повика членките на ЕУ да ги исклучат од клучната инфраструктура.

Одлуките за телекомуникациската инфраструктура формално ги донесуваат националните влади, но Брисел, преку измени во Законот за сајбер безбедност, сака да го зајакне надзорот и да ги направи препораките на Европската комисија правно обврзувачки низ целата ЕУ.

Предложените измени би вклучувале и проценка на ризикот од странско политичко влијание и зависност од одредени добавувачи.

Европските земји ги балансираат економските односи со Кина и безбедносните предупредувања од САД и европските сојузници за можните ризици од кинеската технологија во критичната инфраструктура.

Пратениците и експертите за безбедност во Европа и САД со години предупредуваат дека кинеските компании би можеле да добијат неовластен пристап до корисничките податоци преку телекомуникациските мрежи, додека Хуавеи и ЗТE ги отфрлаат тврдењата.

Портпаролот на Хуавеи процени дека исклучувањето на кинеските добавувачи само врз основа на земјата на потекло би претставувало кршење на основните правни принципи на Европската Унија.