Повеќе од 100 луѓе загинаа откако обилни дождови и поплави ги погодија деловите на Тајланд и Индија, влијаејќи врз милиони луѓе, објавија во вторникот локалните власти и медиумите.
Во Тајланд, поплавите однесоа 23 животи и погодија повеќе од 2,6 милиони луѓе во 29 провинции и во главниот град Бангкок, објави весникот „The Nation“, повикувајќи се на Одделот за спречување и ублажување на катастрофи.
Најновиот извештај на одделот, објавен денес во 6 часот наутро (понеделник, 23:00 часот по Гринич), наведува дека поплавите сè уште се присутни во 167 окрузи, 890 потокрузи и 5.077 села, погодувајќи 940.300 домаќинства.
Нивото на водата растело во 14 провинции, било стабилно во шест провинции и во Бангкок, а се повлекувало во девет други, според податоците на одделот.
Бангкок е меѓу најтешко погодените области откако повеќедневните обилни врнежи ги поплавија патиштата и станбените населби. Локалните власти продолжија со испумпување на водата од погодените подрачја откако интензитетот на дождот се намали.
Во меѓувреме, најмалку 81 лице загина, а 62 беа повредени во северната индиска држава Утар Прадеш во периодот од 25 до 27 септември, објави весникот „The Times of India“, повикувајќи се на државната Канцеларија на комесарот за помош при катастрофи.
Оштетени се најмалку 2.254 куќи и угинале 154 животни, додека властите продолжуваат да ја проценуваат штетата на земјоделските култури, се наведува во извештајот.
Државата добила просечно 66,5 милиметри (2,6 инчи) дожд во текот на 48-часовен период, што е значително над вообичаените 7,6 милиметри (0,3 инчи) – односно 775% над нормалата, според извештајот.
Педесет и шест од вкупно 75 окрузи во Утар Прадеш забележале „голем вишок“ на врнежи, се додава во извештајот.
Во меѓувреме, во Мјанмар е потврдена смртта на најмалку едно лице, додека повеќе од десетина луѓе се водат како исчезнати поради поплавите во јужниот регион Танинтари, објави медиумот „Myanmar Now“.
