Собранието вечерва со 69 гласа „за“, без ниту еден глас „против“ или „воздржан“, ја изгласа реконструкцијата на владиниот кабинет, предложена од премиерот Христијан Мицкоски, која беше на дневен ред на 112. собраниска седница.

Мнозинството од пратениците или поточно 69 од нив, гласаше Јетон Шасивари да биде нов министер за правда, Агон Ферати за нов министер за односи меѓу заедниците, Борче Серафимовски за нов министер за земјоделство, шумарство и водостопанство, а Сашо Клековски да го предводи Министрството за здравство.

На чело на ресорот за социјална политика, демографија и млади е избран Ѓоко Велковски, Иван Стоилковиќ е нов министер за локална самоуправа, Седат Сулејмани седнува во ресорот култура и туризам, додека Ерџан Демир е изгласан за нов министер без ресор.

Пратениците од опозицијата ја напуштија седницата и не учествуваа во гласањето.

Непосредно пред чинот на гласањето, од говорницата се обрати и премиерот Христијан Мицкоски, кој повторувајќи ги своите зборови од воведниот говор при пртетставувњето на, сега веќе новозибраните членови на Владата, дека е горд со сите свои соработници и министри, вклучувајќи ги и тие што беа заменети.

Собранието претходно денеска ги изгласа разрешувањата на дел од членовите на Владата, како дел од најавената реконструкција, а беа разрешени седум министри и двајца заменици министри.

Од функциите си заминаа министрите за правда Игор Филков, за земјоделство, шумарство и водостопанство Цветан Трипуновски, за односи меѓу заедниците Игор Стоиљковиќ, за здравство Азир Алиу, за социјална политика, демографија и млади Фатмир Лимани, за локална самоуправа Златко Перински, како и министерот без ресор Шабан Салиу.