Американскиот претседател Доналд Трамп денес изјави дека САД можеби ќе мора повторно да го нападнат Иран, велејќи дека Техеран моли за договор.

Трамп во Вашингтон изјави дека можеби ќе мора да му зададе уште еден голем удар на Иран, објави Скај њуз.

„Тие бараат да се постигне договор - но можеби ние ќе мора да им зададеме уште еден голем удар. Сè уште не сум сигурен - наскоро ќе знаеме“, рече Трамп.

Тој повтори дека Иран не може да поседува нуклеарно оружје.

Трамп ги обвини демократите, неговите политички противници, за попречување на преговорите со Иран.

„Бев само еден час од донесување одлука денес за напад, изјави Трамп.

Тој исто така рече дека иранските лидери молат да се постигне договор, но дека ако не се постигне, ќе следи уште еден напад од САД во наредните денови.

„Па мислам дека два или три дена, можеби петок, сабота, недела, нешто слично, можеби почетокот на следната недела, за ограничено време бидејќи не можеме да им дозволиме да имаат ново нуклеарно оружје“, нагласи тој.

Трамп во понеделник изјави дека го одложил воениот напад врз Иран што бил планиран за денес откако рече дека лидерите на Катар, Саудиска Арабија и Обединетите Арапски Емирати го повикале да почека поради тековните преговори за можен договор.

Тој додаде дека, според проценката на емирот на Катар Тамим бин Хамад ал Тани, саудискиот престолонаследник Мохамед бин Салман ал Сауд и претседателот на Обединетите Арапски Емирати Мохамед бин Зајед ал Нахјан, постои реална шанса да се постигне договор што би бил прифатлив за Соединетите Американски Држави и земјите од Блискиот Исток, но и пошироко.

Најновиот мировен предлог што Техеран го достави до Вашингтон вклучува крај на конфликтот на сите фронтови, вклучувајќи го и Либан, повлекување на американските трупи од областите во близина на Иран и надомест за штетата предизвикана од војната меѓу САД и Израел, објавија државните медиуми во вторник.