Израелската армија денеска според израелските медуми заплени повеќе од 40 од 54 бродови што учествуваа во флотилата „Глобал Сумуд“ што се движеше кон Газа.

Војската, исто така, привела околу 300 активисти, објави израелската новинска веб-страница „Вала“, повикувајќи се на неименуван безбедносен извор.

Вала додаде дека израелската морнарица сè уште не ги пресретнала сите бродови од флотилата и дека неколку бродови останале на отворено море.

Израелската армија го започна нападот врз флотилата што носеше хуманитарна помош во меѓународни води вчера, предизвикувајќи широка меѓународна осуда.

Со учество на 54 бродови, флотилата исплови во четврток од турскиот округ Мармарис во нов обид да се пробие нелегалната израелска блокада наметната врз Газа од 2007 година.

Ова не е прв ваков инцидент со флотилата.

Кон крајот на април, израелската армија нападна бродови од флотилата во меѓународни води покрај грчкиот остров Крит. Конвојот во тоа време вклучуваше 345 учесници од 39 земји, меѓу кои и турски државјани.

Потоа израелските сили запленија 21 брод со околу 175 активисти, додека преостанатите бродови продолжија кон грчките територијални води.

Израелските сили подоцна ги ослободија активистите во меѓународните води, освен двајца - еден шпански и еден бразилски активист - кои беа однесени во центри за притвор во Израел пред подоцна да бидат депортирани.

Околу 2,4 милиони Палестинци, вклучувајќи приближно 1,5 милион раселени лица, живеат во катастрофални хуманитарни услови во Газа, влошени од двегодишниот израелски геноцид во кој загинаа повеќе од 72.700 луѓе и беа повредени над 172.700, повеќето од нив жени и деца, покрај тоа што предизвика сериозни услови на глад.

И покрај прекинот на огнот објавен во октомври 2025 година, Израел продолжи да го ограничува пристапот до хуманитарна помош и да извршува дневни напади, што резултираше со смрт на 877 Палестинци и повреди на 2.602 други, според локалните власти.