TikTok (ТикТок) и матичната компанија ByteDance се согласија да платат 400 милиони долари во рамки на спогодбата со Министерството за правда на САД поради обвиненијата дека платформата го прекршила законот за заштита на приватноста на децата на интернет.

TikTok веднаш ќе плати 300 милиони долари, а дополнителни 100 милиони долари откако судот ќе ја отфрли претходната одлука за спогодба, која го опфаќа неговиот претходник, апликацијата Musical.ly, соопшти Министерството за правда.

Министерството ги тужеше TikTok и ByteDance во 2024 година, наведувајќи дека платформата го прекршила Законот за заштита на приватноста на децата на интернет (COPPA), дозволувајќи им на деца помлади од 13 години да креираат профили и не бришејќи ги нивните профили и податоци кога тоа го барале нивните родители.

„Оваа спогодба е голема победа за американските деца и родители“, изјави заменик-јавниот обвинител Стенли Вудворд Џуниор.

„Приоритет на Министерството е да обезбеди децата да бидат заштитени на интернет и компаниите на кои им се доверени нивните лични информации да ги исполнуваат своите законски обврски“, рече Вудворд.

„Ова решение обезбедува значителна отштета, истовремено зајакнувајќи ја заштитата што семејствата ја очекуваат и ја заслужуваат“, додаде тој.

Министерството за правда наведе дека TikTok „претрпел значителни промени во сопственичката структура, управувањето, функциите за усогласеност и практиките за заштита на приватноста“ откако беше поднесена тужбата.

TikTok сега е под контрола на компанијата TikTok USDS Joint Venture, која е во мнозинска сопственост на американски инвеститори, по усвојувањето на закон во 2024 година со кој се бараше ByteDance да го продаде својот удел во апликацијата или да се соочи со забрана во САД.

Законот беше донесен поради загриженоста за националната безбедност и приватноста, поврзани со врските на ByteDance со Кина.