Германскиот канцелар Фридрих Мерц во средата изјави дека Европа не бара трговска војна со Кина, но е решена да ја заштити својата индустрија од нефер практики, пренесува Анадолу.

Говорејќи на конференцијата „Берлински глобален дијалог“, Мерц нагласи дека ЕУ мора да преземе мерки со оглед на големиот трговски дефицит што го има со Кина. Тој истакна дека, на иницијатива на Франција и Германија, се подготвуваат трговски одбранбени механизми за да се спротивстават на практиките што ги нарушуваат пазарните услови.

„Ова не е почеток на војна – трговска војна – со Кина. Ние бараме мирни решенија“, нагласи Мерц.

Европа ќе ги држи овие механизми подготвени за употреба, додека истовремено ќе се стреми да ги реши прашањата со Кина преку дијалог, додаде тој.

„Ние отвораме кутија со алатки. Ја покажуваме таа кутија. Но, не сакаме да посегнеме по тие алатки“, рече германскиот канцелар.

„Значи, на овој начин, подготвени сме да се браниме од нефер практики. А дијалогот веќе започна. Тој е подлабок од кога било претходно.“

Иако упати критики кон одредени кинески трговски практики, Мерц нагласи дека европската и германската индустрија мора да ја зајакнат сопствената конкурентност.

„Мораме да си ја завршиме домашната задача. Далеку сме од тоа да бидеме доволно конкурентни за да одговориме на овие глобални предизвици“, рече тој.

Европа нема намера да го затвори својот пазар за кинеските компании и производи, додаде Мерц, но бара фер трговија и еднакви услови за сите учесници на пазарот.