Францускиот министер за економија, Ролан Лескир штетата предизвикана од насилството и немирите за време на викендот ја процени на „десетици или можеби стотици милиони“ евра.

Лескир ги опиша инцидентите како „исклучително сериозни“, велејќи дека Франција била нападната одвнатре од „две насилни движења: анархисти и бандити“.

Тој рече дека владата соработува со осигурителните компании за да ги поддржи трговците погодени од штетата и вети дека властите ќе ги преземат сите потребни мерки за ова да не се повтори.

„Ќе направиме сè што е можно за да спречиме ова да се случи повторно“, рече Лескур, осврнувајќи се на новите демонстрации планирани за сабота.

Движењето „Жолти елеци“ објави планови за одржување демонстрации во Париз во сабота, а координаторот Бенџамин Бол изјави дека до париската полициска префектура е поднесена формална декларација.

Парискиот огранок на Генералната конфедерација на трудот и студентскиот сојуз, исто така, објавија планови за собирање во Бастилја, додаде тој.

Планираните демонстрации доаѓаат една недела откако протестот против растечките трошоци за живот во француската престолнина прерасна во конфликти, со пријавени инциденти на насилство и материјална штета.

Околу 550.000 луѓе излегоа на улиците низ Франција на 17 октомври, кога избувнаа судири меѓу демонстрантите и полицијата, беа запалени возила, неколку продавници беа ограбени, а повеќе од 2.000 луѓе беа уапсени.