Србија ја прифати помошта од Европската Унија за гаснење на големите пожари во Специјалниот природен резерват Делиблатска Песчара, а во земјата се испратени хеликоптери од Романија, Словачка и Чешка, како и копнени тимови од Германија и Романија, објавија во саботата регионалните медиуми.

Европската комесарка за еднаквост, подготвеност и управување со кризи, Хаџа Лахбиб, соопшти дека четири хеликоптери и тимови за гаснење пожари се распоредени преку Механизмот за цивилна заштита на ЕУ.

Хеликоптери од Романија и Словачка веќе пристигнаа во Србија и се очекува да започнат со дејствување на пожариштата, додека Чешка испрати два летала за гаснење пожари од воздух.

Чешката противпожарна и спасувачка служба соопшти дека, на барање на Србија упатено преку Механизмот за цивилна заштита на ЕУ, веднаш реагирала со испраќање два модула за гаснење пожари од воздух.

Романија во Србија испрати хеликоптер „Black Hawk“ S-70M, кој е дел од европскиот резервен капацитет rescEU во рамките на Механизмот за цивилна заштита на ЕУ. Според романските власти, пожарите во Делиблатска Песчара зафатиле повеќе од 3.500 хектари.

Покрај хеликоптерот, Романија подготвува и копнен интервентен тим составен од 69 лица и 15 возила. Тимот ќе биде распореден на локации што ќе ги определат властите во Србија и ќе им пружа поддршка на локалните сили, особено во тешко пристапните подрачја.

Министерството за внатрешни работи на Србија соопшти дека помошта од ЕУ е прифатена по активирањето на Механизмот за цивилна заштита на ЕУ поради пожарите во Делиблатска Песчара, но и поради можноста од потреба за интервенција во други делови од земјата.

Во рамките на помошта од ЕУ предвидени се хеликоптери распоредени во Романија, Чешка и Словачка, како и копнени тимови и возила од Германија и Романија.