Црногорската полиција во среда им забрани влез во земјата на група од најмалку 90 лица од Србија кои пристигнале во Тиват со чартер лет од Белград, поради, како што пишуваат црногорските медиуми, наводно сомневање за субверзивни активности пред самитот ЕУ-Западен Балкан, кој ќе се одржува на црногорскиот брег во четврток и петок.
Како што пишува Вијести, меѓу патниците во авионот имало регистрирано и „лица од интерес за безбедноста“ и сите тие ќе бидат вратени од Тиват во Белград со првиот лет.
Според весникот, патниците не сакале да одговорат на прашањата на полицијата за тоа зошто дошле во Црна Гора.
Според информациите со кои располага Полициската управа, пишува Вијести, лицата на летот, кои претежно имаат криминални досиеја, имале задача неформално да го обезбедат престојот на претседателот на Србија, Александар Вучиќ, на самитот ЕУ-Западен Балкан во Тиват.
Во соопштението на црногорската полиција се наведува дека тие спроведуваат обемни, континуирани и засилени активности по повод самитот ЕУ-Западен Балкан и дека во овој контекст се спроведуваат зголемени контроли на граничниот премин на аеродромот Тиват.
Поради оваа причина, чартер летот на релација Белград-Тиват, на кој околу 90 српски државјани пристигнаа во Црна Гора во среда, е ставен под контрола.
„Во тек се контроли на овие лица и проверка на причините за нивното пристигнување и престој, а ќе бидат преземени сеопфатни мерки и дејствија согласно законот, како и рестриктивни мерки доколку за тоа постојат законски основи“, велат од полицијата.
Авионот е задржан на пистата на аеродромот Тиват со цел да се извршат детални проверки на лицата што пристигнале, односно причината за нивната посета, имајќи ги предвид зголемените безбедносни мерки пред самитот на ЕУ за Западен Балкан. Јавноста ќе биде навремено информирана за понатамошните преземени активности, додава Полициската управа на Црна Гора.
Црногорските медиуми претходно објавија дека повеќе од 1.500 полицајци од сите организациски единици на Полициската управа, вклучувајќи ги и тактичките, ќе го обезбедуваат самитот Европска унија-Западен Балкан, кој ќе се одржи на 4 и 5 јуни во Тиват.
Самитот ќе ги собере учесниците на највисоко политичко ниво. Меѓу учесниците се претседателот на Европскиот совет Антонио Кошта, претседателката на Европската комисија Урсула фон дер Лајен, францускиот претседател Емануел Макрон, германскиот канцелар Фридрих Мерц, шпанскиот премиер Педро Санчез, италијанската премиерка Џорџија Мелони, како и бројни други европски и регионални лидери.
Црногорскиот премиер Милојко Спајиќ изјави во вторникот во парламентот дека факторите на надворешната политика и групите на организиран криминал работат заедно против европскиот пат на Црна Гора, додавајќи дека Европската унија сака да обезбеди максимална поддршка во борбата против ваквите влијанија.
„За прв пат во Црна Гора имаме комбинација од геополитички актери и криминални групи кои работат против интересите на европскиот пат на Црна Гора. Ги отворивме очите широко“, рече Спајиќ.
