Американскиот претседател Доналд Трамп изјави дека ја паузирал одлуката за планираните царини од 50% за канадските стоки пред крајниот рок на полноќ.

„Ги паузирав царините од 50% против Канада, кои требаше да стапат во сила утре наутро, за период од три дена, врз основа на фактот дека Канада и САД, во зависност од финализирањето на документите, имаат договор!“, објави Трамп.

Претседателот на САД, исто така, посочи дека договорот би можел да го оживее гасоводот Кистоун ХЛ, голем прекуграничен енергетски проект кој беше откажан за време на претходната администрација на Бајден.

„Големиот гасовод Кистоун, одамна уништен од поспаниот Џо Бајден, можеби ќе биде разбуден од гробот!“, рече тој.

Соопштението уследи по телефонскиот разговор во вторникот меѓу Трамп и канадскиот премиер Марк Карни, кој се обидуваше да постигне договор и да ги избегне царините за канадска стока во вредност од околу 30 милијарди канадски долари (22 милијарди американски долари).

Од своја страна, Карни рече дека САД се согласиле да ја одложат имплементацијата на планираната царина од 50% за низа канадски стоки согласно Член 338 од Законот за царини на САД од 1930 година до крајот на денот на 21 август.

Канада и САД во последните недели водеа „интензивни разговори“ со цел решавање на трговските спорови и обезбедување поголема сигурност за канадските бизниси, работници, земјоделци и семејства, додаде тој.

„Постигнат е значителен напредок, иако сè уште има важна работа што треба да се заврши“, рече Карни.

Канада ќе остане фокусирана на зајакнување на својата домашна економија додека продолжуваат преговорите, додаде тој.