Канадскиот премиер Марк Карни ги повика Франција, Канада, САД и Кина да соработуваат за да се осигура дека вештачката интелигенција е безбедна и ефективна.

Говорејќи заедно со францускиот претседател Емануел Макрон во француската прекуморска територија Сен Пјер и Микелон во неделата, Карни ги опиша овие четири земји како предводници во областа на вештачката интелигенција и ја истакна потребата од соработка.

„Мораме да ги здружиме силите за да обезбедиме соодветна регулатива и да се осигураме дека вештачката интелигенција е безбедна и ефективна“, рече тој.

По средбата, од кабинетот на Карни соопштија дека двајцата лидери нагласиле оти водечките нации во областа на вештачката интелигенција, вклучително и Канада и Франција, „мора да соработуваат“.

Според официјалното соопштение, Карни ја истакнал и улогата на Канада како сигурен партнер во одговорниот развој на новите технологии.

Овие изјави беа дадени за време на првата официјална посета на еден канадски премиер на Сен Пјер и Микелон, француски архипелаг лоциран во близина на атлантскиот брег на Канада.

Карни и Макрон, исто така, се договорија да ја продлабочат соработката во стратешките сектори, вклучувајќи ги одбраната, воздухопловството, вселенската инфраструктура, енергетската безбедност и новите технологии.