Цената на нафтата денес падна на помалку од 100 долари за барел, а европските индекси забележаа силен раст откако американскиот претседател Доналд Трамп објави дека американската војска би можела да ги заврши своите воени дејствија во Иран во рок од две до три недели, додека одговорноста за повторно отворање на Ормускиот теснец ќе ја преземат други нации.

Трамп, исто така, објави дека ќе се обрати до американскиот народ во врска со војната на Блискиот Исток, во четврток во три часот наутро по средноевропско време.

Според податоците на берзите, цената на суровата нафта падна за 4,23% на 97,089 долари за барел во 9:30 часот наутро, а цената на нафтата од типот Брент падна за 4,1% на 99,704 долари.

Европските фјучерси за гас за мај беа продадени на отворањето на берзата ТТФ во Амстердам по цена од 49,765 евра за мегават-час.

Цената на златото се искачи на 4.732,22 долари за тројанска унца, а цената на пченицата падна на 6,0708 долари за бушел (еден бушел е еднаков на 27,216 кг).

Вредноста на еврото во однос на доларот на Форекс берзата е 1,15880 долари, што е за 0,3% повисока отколку на почетокот на тргувањето.

Според податоците од американските берзи, вредноста на индексот Дау Џонс на затворањето на берзата во вторник се зголеми за 2,49% на 46.341,51 поени, С&П500 за 2,91% на 6.528,52 поени, а вредноста на индексот Насдак за 3,83% на 21.590,63 поени.