Украинскиот претседател Володимир Зеленски изјави дека Русија наводно сака Украина да ги повлече своите сили од Донбас во рок од два месеци, тврдејќи дека по тоа војната би можела да заврши, дознава Укринформ.

„Русија сега ѝ поставува нови услови на американската страна, наведувајќи дека ќе го окупираат источниот дел од нашата земја за два месеци, поточно Донбас, и дека Украина има тој рок да се повлече. Доколку Украина не се повлече, Русија планира понатамошни окупации и нови услови“, рече Зеленски.

Претседателот на Украина нагласи дека, според него, вистинската цел на Русија не е само Донбас, туку пошироки планови што се кријат зад ултиматумот.

Тој додаде дека руската страна добро разбира дека нема да може да го окупира регионот во предвидениот рок, поради што прибегнува кон притисок врз своите партнери.

Тој, исто така, истакна дека Украина е подготвена за компромис и прекин на огнот на позициите што ги држи, како дел од дипломатскиот пристап.

Зеленски изрази сомнеж дека Русија планира општа мобилизација во блиска иднина, иако немаше целосни информации за ова прашање.

Портпаролот на Кремљ, Дмитриј Песков, пак, рече дека Зеленски требало да донесе одлука за повлекување на украинските од Донбас, не денеска, туку „вчера“.

„Што се однесува до два месеци, не станува збор за два месеци. Зеленски уште денес треба да донесе одлука украинските трупи да го напуштат Донбас и да ја преминат административната граница на Донецката Народна Република. Ова е кажано многу пати“, изјави Песков, одговарајќи на новинарско прашање дали имало услови што Москва му ги дала на Киев за повлекување.

Песков истакна дека Зеленски требало да донесе таква одлука „вчера“.

„Како што разговаравме, треба да се преземе одговорност и да се донесе толку тешка одлука. Ова би можело да ги спаси животите на многу луѓе. И, најважно, да се помогне да се запре жешката фаза од оваа војна“, додаде Песков.

Според него, паузата во трилатералните преговори за украинското решение е последица на фактот дека американските преговарачи се преокупирани со ситуацијата на Блискиот Исток.

„Паузата во трилатералните преговори за Украина не е поврзана со очекувањето за исполнување на условите за повлекување на украинските вооружени сили од територијата на Донбас“, додаде тој.

Руското Министерство за одбрана денеска соопшти дека неговите сили ја презеле целосната контрола врз регионот Луганск во источна Украина, објави државната новинска агенција РИА.

Повеќе од 99 проценти од Луганск, еден од четирите украински региони што Русија ги прогласи за свои во 2022 година, потег што Киев и повеќето западни земји го отфрлија како нелегално територијално присвојување, долго време е под руска контрола.

Руското Министерство за одбрана соопшти дека руските сили ја презеле и контролата врз селата Верхња Писаривка во регионот Харков и Бојкове во регионот Запорожје во југоисточна Украина.