Кинескиот претседател Кси Џинпинг во четвртокот предупреди за судири меѓу Кина и САД ако прашањето за Тајван „не се реши правилно“, според државните медиуми.

Прашањето за Тајван е „најважното прашање во односите меѓу Кина и САД“, му рекол Кси на американскиот претседател Доналд Трамп додека го угостил во Големата сала на народот, церемонијалната државна зграда на Кина, според новинската агенција Синхуа.

„Ако се реши правилно, билатералните односи ќе уживаат целокупна стабилност. Во спротивно, двете земји ќе имаат судири, па дури и конфликти, ставајќи го целиот однос во голема опасност“, рече тој.

Мирот во Тајванскиот теснец е „непомирлив како оган и вода со независноста на Тајван“, рече Кси.

„Зачувувањето на мирот и стабилноста преку Тајванскиот Теснец е најголемиот заеднички именител меѓу“ двете земји, додаде тој.

Конфликтот на Блискиот Исток, Тајван, трговијата и царините беа меѓу прашањата за кои се очекуваше да бидат високо на агендата во разговорите меѓу двајцата лидери.

Трамп во понеделникот рече дека ќе има „таа дискусија со претседателот Кси“ кога беше прашан за поддршката на САД за одбраната на Тајван.

„Претседателот Си би сакал да не го сториме тоа, и јас ќе ја водам таа дискусија. Тоа е едно од многуте работи за кои ќе зборувам“, додаде тој.

Според Ен-Би-Си Њуз, пак, Белата куќа објави соопштение за разговорите меѓу Трамп и Кси во кое воопшто не се споменува прашањето за Тајван, туку главно се фокусира на војната во Иран и ситуацијата со Ормускиот Теснец.

Според Њујорк тајмс, двопартиска група сенатори го повикаа Трамп да продолжи со одложениот рекорден пакет оружје од 14 милијарди долари за Тајван, кој е во застој во американскиот Стејт департмент со месеци.

Како главен снабдувач со оружје на Тајван, САД одобрија продажба на оружје од 11 милијарди долари минатата година, што предизвика протести од Пекинг.

Кина го смета самоуправуваниот остров Тајван за своја „отцепена покраина“, додека Тајпеј инсистира на својата независност од 1949 година.