Двајца тинејџери вчера беа убиени, а пет други беа повредени откако тепачка ескалираше во пресметка со огнено оружје во јавен парк до средно училиште во Винстон-Сејлем во американската држава Северна Каролина, соопштија властите.

Полицајците пронајдоа 17-годишно момче, Ерубеј Ромеро Медина, на блискиот паркинг со прострелна рана. Подлабоко во паркот, го пронајдоа 16-годишниот Даниел Хименез Милијан, кој исто така беше застрелан. Двајцата беа прогласени за мртви на местото на настанот.

Покрај жртвите, повредени се уште пет тинејџери на возраст од 14 до 19 години, со состојба која се движи од сериозна до полесна, се додава во извештајот.

Службениците не ги објавија нивните имиња, но рекоа дека во групата имало четири девојчиња и едно момче.

Истражителите сè уште работат на утврдување на вмешаноста на секое лице. Првичните сознанија укажуваат дека некои од повредените можеби учествувале и во пукањето.

Полицијата првично не привела ниту еден осомничен, а властите соопштија дека истрагата е сè уште во тек.