„Туркиш ерлајнс“ ќе стане главен клупски партнер на Ливерпул, вклучително и негов спонзон кој ќе стои на предната страна на дресовите, почнувајќи од сезоната 2027-28, објави клубот од Премиер лигата.

„Од јуни 2027 година, ‘Туркиш ерлајнс’ ќе стане главен клупски партнер на ФК Ливерпул, обединувајќи две организации со заеднички меѓународен дострел и посветеност на поврзување на луѓето низ целиот свет“, се вели во соопштението на клубот.

Брендот на авиокомпанијата ќе се појави на предната страна на машките, женските и дресовите на Академијата на Ливерпул од почетокот на партнерството.

Петгодишниот договор изнесува над 300 милиони фунти или над 60 милиони фунти по сезона, според наводите.

„Ова е пресвртница за нас и со задоволство го пречекуваме „Туркиш ерлајнс“ како наш главен клупски партнер од јуни 2027 година“, рече главниот комерцијален директор на Ливерпул, Бен Лати.

„Предниот дел од дресот на Ливерпул има посебно место во историјата на нашиот клуб. „Туркиш ерлајнс“ е глобално призната организација со широка меѓународна мрежа и со нетрпение очекуваме да го започнеме нашето партнерство и да изградиме силна врска заедно, со веќе силни темели изградени од тие посебни спомени во 2005 година.“

Лати се осврна на незаборавниот триумф на Ливерпул во Лигата на шампионите на УЕФА над Милан во Истанбул во 2005 година.

Извршниот директор на „Туркиш ерлајнс“, Ахмет Олмуштур, го опиша Ливерпул како „еден од најпрепознатливите и најпочитуваните фудбалски клубови во светот, со исклучително наследство и навистина глобална заедница на навивачи“.

„Многу сме задоволни што „Туркиш ерлајнс“ ќе стане главен клупски партнер на клубот и што нашето име ќе го заземе своето место на еден од најзначајните дресови во светскиот спорт“, додаде тој.

„Стандард Чартерд“, главен клупски партнер на Ливерпул од 2010 година, ќе ја задржи својата сегашна улога во текот на сезоната 2026-27, а потоа ќе премине во улога на глобално партнерство следната година, соопшти клубот.