Kryetari i Parlamentit të Iranit, Mohammad Bagher Ghalibaf, paralajmëroi të martën se asnjë vend në rajon nuk do të jetë në gjendje të shesë naftë nëse Irani pengohet ta bëjë këtë, njoftoi agjencia shtetërore e lajmeve IRNA.
“ShBA-ja dhe vendet e tjera duhet ta dinë, siç kemi thënë, se në një rajon ku ne nuk mund të shesim naftë, askush nuk do të shesë naftë”, tha Ghalibaf.
Paralajmërimi i tij vjen në një kohë kur Irani përballet me kufizime të ashpra ndaj eksporteve të naftës, në kushtet e konfliktit në vazhdim me Washingtonin dhe sanksioneve amerikane.
Guvernatori i Bankës Qendrore të Iranit, Abdolnaser Hemmati, tha në gusht se eksportet e naftës së vendit kishin rënë në zero, duke deklaruar se Teherani nuk po eksportonte më naftë bruto për shkak të luftës dhe sanksioneve.
Ndërkohë, ushtria amerikane tha më 19 shtator se më shumë se 1 miliard fuçi naftë bruto kishin kaluar nëpër Ngushticën e Hormuzit.
Hakmarrje e shpejtë ndaj “aventurizmit”
Ghalibaf paralajmëroi gjithashtu Uashingtonin kundër presionit të mëtejshëm ndaj Teheranit, duke thënë se Irani nuk do të tërhiqet përballë asaj që ai e përshkroi si “bllokadë ajrore ose tregtare”.
Komentet e tij vijnë në një kohë kur Uashingtoni ka zgjeruar presionin ekonomik përtej sektorëve të naftës dhe transportit detar të Iranit, duke përfshirë edhe aviacionin civil.
“Udhëheqësit e Shtëpisë së Bardhë duhet ta dinë se Irani, një komb i mençur që ka bërë histori, nuk do të tërhiqet kurrë për shkak të vijave të kuqe, deklaratave apo bllokadave ajrore ose tregtare”, tha Ghalibaf.
Ai shtoi se përgjigjja e Iranit ndaj “çdo kërcënimi apo aventurizmi” do të ishte “e keqardhshme dhe e shpejtë”.
Në shkurt, ShBA-ja dhe Izraeli nisën një luftë kundër Iranit, i cili u kundërpërgjigj me sulme ndaj Izraelit dhe objektivave amerikane në rajon, përpara se në prill të arrihej një marrëveshje armëpushimi.
Më vonë, në qershor, Uashingtoni dhe Teherani nënshkruan një memorandum mirëkuptimi lidhur me lirinë e lundrimit në Ngushticën e Hormuzit, por zbatimi i tij ngeci për shkak të mosmarrëveshjeve lidhur me sigurinë në këtë rrugë ujore strategjike, ndërsa tensionet mes dy palëve vazhdojnë të përshkallëzohen.
