Një shtetas austriak, i dyshuar si “turist snajperist” gjatë rrethimit të Sarajevës në vitet 1990 dhe që dyshohet se ka paguar para për të qëlluar mbi civilë të pafajshëm, është nën hetim nga prokuroria e Vjenës, njoftoi qeveria austriake.

Ministria austriake e Drejtësisë njoftoi të martën nisjen e hetimeve ndaj qytetarit austriak, të cilat kanë filluar në prill, si përgjigje ndaj një kërkese parlamentare nga ish-ministrja e Drejtësisë, Alma Zadic, e cila është gjithashtu zëdhënëse e Partisë së Gjelbër për çështjet e drejtësisë.

Ministria shtoi se edhe një i dyshuar tjetër, ende i paidentifikuar, është nën hetim.

Sipas autoriteteve, në këtë fazë të hetimeve ekzistojnë baza të vlefshme dyshimi ndaj personave të përfshirë.

Të dyshuarit akuzohen se kanë marrë pjesë në të ashtuquajturat “ture snajperësh” në Sarajevë gjatë luftës në Bosnjë. Sipas pretendimeve, burra të huaj paguanin deri në 100 mijë euro për të qëlluar mbi njerëzit në qytetin e rrethuar.

Pretendimet për këto “ture snajperësh” u publikuan nga gazetari dhe autori italian Ezio Gavazzeni.

Megjithatë, ministria tha se hetimet austriake nuk bazohen në kërkimet e Gavazzenit dhe nuk dihet nëse autoritete apo misione diplomatike austriake kanë pasur më herët qasje në informacionet e tij.

Në një deklaratë të mërkurën, deputetja e Partisë së Gjelbër, Alma Zadic, mirëpriti hetimet, duke thënë se akuzat përbëjnë “krimet më të rënda të luftës” dhe duhet të hetohen plotësisht.

Gjatë rrethimit të Sarajevës nga viti 1992 deri në vitin 1996, forcat serbe rrethuan dhe bombarduan qytetin, duke vrarë më shumë se 11.500 civilë, përfshirë mbi 1.600 fëmijë, ndërsa trashëgimia kulturore dhe infrastruktura e qytetit pësuan dëme të mëdha.