"Turkish Airlines" finalizoi të mërkurën një marrëveshje me Boeing për blerjen e deri në 150 avionëve 737 MAX, duke shënuar porosinë më të madhe të kompanisë ajrore për avionë.

Marrëveshja, e arritur pas negociatave që nisën në vitin 2025, është pjesë e strategjisë afatgjatë të rritjes së "Turkish Airlines" dhe synon të forcojë rrjetin e fluturimeve të shkurtra dhe të mesme si dhe të mbështesë zgjerimin e flotës.

Marrëveshja u finalizua në prani të presidentit turk Recep Tayyip Erdoğan. Sipas marrëveshjes, "Turkish Airlines" do të porosisë 100 avionë Boeing 737-8, ndërsa do të ketë mundësi të blejë edhe 50 avionë të tjerë Boeing 737 MAX.

Marrëveshja i jep kompanisë mundësinë për të kaluar në modelin Boeing 737-10, më i madhi i familjes 737 MAX. Kjo mundësi do t'i lejojë "Turkish Airlines" të përshtatë kapacitetin e flotës sipas kërkesës së udhëtarëve dhe nevojave operacionale në rrjetin e saj.

"Kjo marrëveshje përfaqëson një hap të rëndësishëm në përputhje me strategjinë tonë për zgjerimin e flotës", tha Murat Seker, kryetar i Bordit dhe Komitetit Ekzekutiv të "Turkish Airlines".

"Avionët e rinj Boeing 737 MAX do të sjellin më shumë efikasitet dhe fleksibilitet në operacionet tona dhe do të mbështesin rrjetin e gjerë të fluturimeve që shërbejmë nga qendra jonë në Istanbul", tha ai.

Presidentja dhe njëherësh drejtore ekzekutive e "Boeing Commercial Airplanes", Stephanie Pope tha se porosia pasqyronte besimin e ndërsjellë dhe vizionin e përbashkët që kanë formuar partneritetin e gjatë mes kompanive.

"Jemi krenarë që vazhdojmë të mbështesim 'Turkish Airlines' teksa zgjeron rrjetin e saj me bazë në Istanbul, duke lidhur më shumë njerëz me më shumë destinacione në mbarë botën ndërsa mbështesim edhe ekosistemin e aviacionit të Türkiyes", tha Pope.