Presidenti i ShBA-së, Donald Trump, ka deklaruar se negociatat me Iranin për një marrëveshje për t’i dhënë fund armiqësive “ndoshta në një moment” mund të rifillojnë, duke përsëritur gjithashtu pretendimin e tij se SHBA-ja ka “kontroll të plotë” mbi Ngushticën e Hormuzit.

“Për momentin, mendoj se situata është shumë e mirë”, u tha Trump gazetarëve kur u pyet për luftën me Iranin, duke shtuar se bisedimet “ndoshta në një moment” mund të rifillojnë.

Duke iu referuar aftësisë së Iranit për të pasur armë bërthamore, ai tha: “Ata duhet ta heqin qafe plotësisht. Ata nuk duhet të kenë asnjë armë bërthamore. Irani nuk mund të ketë armë bërthamore. E dini pse? Sepse do ta përdornin dhe ne nuk do t’i lejojmë ta përdorin. Pra, Irani nuk mund të ketë armë bërthamore dhe nuk do të ketë”.

“Ne kemi në zotërim, kontrollin e plotë të ngushticës. Dua të them, përveçse për vlerën e bezdisjes dhe ka një vlerë bezdisëse kur ata hedhin një dron herë pas here”, shtoi ai.

Në muajin qershor, Irani dhe ShBA-ja nënshkruan një memorandum mirëkuptimi që synonte t’i japë fund luftës dhe të hapë rrugën për një marrëveshje më të gjerë, por marrëveshja më vonë u prish mes akuzave të ndërsjella për shkelje dhe rifillimit të armiqësive.

Që atëherë, përpjekjet diplomatike nuk kanë arritur të sjellin një përparim lidhur me rihapjen e Ngushticës së Hormuzit apo rifillimin e negociatave drejt një marrëveshjeje më të gjerë.