Organizimi “TEKNOFEST Atdheu Blu” po u ofron studentëve universitarë një platformë për ta shndërruar njohurinë e tyre inxhinierike në projekte të mbrojtjes, duke zhvilluar mjete autonome nënujore dhe duke përmirësuar aftësitë e tyre në prag të karrierës së ardhshme.

Ngjarja e madhe teknologjike, edicioni “Atdheu Blu” i së cilës u kushtohet teknologjive detare, nisi të enjten për të prezantuar kapacitetet e ndryshme detare të vendit, teknologjitë nënujore dhe industrinë e mbrojtjes gjatë ekspozimit katërditor.

Anadolu është partneri global i komunikimit i aktivitetit, ku janë ekspozuar një gamë e gjerë produktesh dhe teknologjish, nga platformat e Forcave Detare Turke të klasave të ndryshme deri te sistemet pa pilot, si dhe nga avionët te sistemet e mbrojtjes ajrore dhe sistemet raketore.

Studentët që kanë avancuar në finale të garave të aktivitetit po kontribuojnë në zhvillimin e industrisë turke të mbrojtjes përmes projekteve të tyre inovative.

Yusuf Akca, student 22-vjeçar i inxhinierisë elektrike dhe elektronike, drejtoi një ekip prej gjashtë personash që u rendit mes 16 finalistëve të garës me mjetin e tyre të prodhuar në vend, të pajisur me raketë nënujore, i projektuar për të transportuar raketë në një pikë të përcaktuar nën ujë.

“Zhvillimi i projektit gjatë garës ishte i vështirë, por unë dhe miqtë e mi e shijuam çdo moment këtu dhe jemi shumë të lumtur që jemi këtu”, tha ai. “Jam i lumtur që po bëj këtu një punë që i sjell dobi vendit në përgjithësi. Është ndjenjë e mrekullueshme të bësh diçka të dobishme”, shtoi Akca.

Muhammet Efe Bagdigen, 23 vjeç, drejtoi një ekip multidisiplinar prej 11 anëtarësh për zhvillimin e një silure nënujore, e cila aktualisht është në fazën e montimit, ndërsa ekipi i tij pret certifikimin përfundimtar për lëshimin e mjetit dhe përfundimin e misioneve të tij autonome.

“Shndërrimi i një projekti që e kemi konceptuar në një produkt në këtë mënyrë është në fakt shumë i rëndësishëm, pasi në thelb po fitojmë përvojë në një mjedis real pune”, tha ai, duke shtuar se mundësitë që ofron TEKNOFEST u japin të rinjve mundësinë të kontribuojnë në industrinë e mbrojtjes së vendit, e cila po zhvillohet me shpejtësi.

Furkan Alper, student 23-vjeçar i inxhinierisë së hapësirës ajrore, drejtoi një ekip prej shtatë anëtarësh që kaloi një vit duke zhvilluar një raketë autonome nënujore, të programuar për të përshkuar 50 metra, për të bërë një kthesë në formë U-je dhe për të lëshuar një raketë model nga një kënd i caktuar nën ujë.

“Këtu në TEKNOFEST po tregojmë se çfarë mund të arrijë rinia turke dhe është shumë e rëndësishme të shohësh anije, sisteme pa pilot dhe produkte të tjera të ndërtuara nga inxhinierë vendas”, tha ai.