Belgjika ka nisur një fushatë kombëtare gatishmërie me qëllim forcimin e qëndrueshmërisë së publikut në rast emergjencash, duke u kërkuar familjeve të jenë në gjendje të përballojnë në mënyrë të pavarur të paktën 72 orë, raportoi agjencia e lajmeve Belga, transmeton Anadolu.
Nisma, e udhëhequr nga Qendra Kombëtare e Krizave, është pjesë e një strategjie afatgjate katërvjeçare për përmirësimin e gatishmërisë ndaj krizave mes tensioneve gjeopolitike në rritje dhe rreziqeve të lidhura me klimën.
Zyrtarët thanë se emergjencat mund të ndodhin "kudo dhe në çdo kohë", duke theksuar se qytetarët duhet të luajnë rol më aktiv krahas shërbimeve të emergjencës dhe mbrojtjes civile.
Faza e parë e fushatës fokusohet në përmirësimin e qasjes në informacione të verifikuara gjatë krizave. Qytetarët inkurajohen të regjistrohen në sistemin BE-Alert - sistemi zyrtar që njofton qytetarët përmes SMS, email ose thirrjeje zanore gjatë emergjencave dhe të mbështeten në kanale zyrtare komunikimi, ndërsa autoritetet paralajmërojnë se dezinformimi mund të përhapet shpejt në situata të tilla.
Qeveria rekomandon që familjet të mbajnë rezerva emergjente për tre ditë, përfshirë ujë, ushqime të pakonsumueshme shpejt, ilaçe bazë, elektrik dore, bateri, para në dorë dhe produkte higjienike.
Gjithashtu, njerëzit inkurajohen të përgatisin një çantë evakuimi me sende thelbësore si dokumente, karikues telefoni, ushqim, ujë dhe pajisje të ndihmës së parë.
Fushata do të zgjerohet gradualisht për të përfshirë skenarë të tjerë, përfshirë rreziqe bërthamore dhe do të përfshijë autoritetet lokale për të siguruar që udhëzimet të përshtaten me kushtet e përditshme.
Ministri i Brendshëm Bernard Quintin i tha të përditshmes "Het Laatste Nieuws" se rreziqet e lidhura me konfliktet dhe fatkeqësitë natyrore janë rritur vitet e fundit, por theksoi se nisma nuk synon të krijojë frikë.
“Gatishmëria është përgjegjësi e përbashkët,” tha ai duke shtuar se autoritetet nuk duhet të injorojnë rreziqet e mundshme.
Zyrtarët thanë se qëllimi është gatishmëri praktike dhe jo alarm, duke theksuar se përgatitja më e mirë do t'u mundësonte shërbimeve të emergjencës të përqendrohen tek më të cenueshmit gjatë krizave.
