Izraeli dhe ShBA-ja janë duke negociuar një marrëveshje të re shumëvjeçare për ndihmën ushtarake, raportoi të hënën gazeta izraelite "Yedioth Ahronoth".
Sipas gazetës, Izraeli synon ta përmbyllë marrëveshjen para se Kongresi i ri amerikan të nisë punën në janar, për shkak të shqetësimeve se pengesat politike mund të ndikojnë në vazhdimësinë e ndihmës.
Partia Demokratike fitoi kontrollin e Kongresit nga Partia Republikane e presidentit amerikan Donald Trump në zgjedhjet e mesmandatit të 3 nëntorit.
"Yedioth Ahronoth" raportoi se ndihma ushtarake amerikane për Izraelin “nuk do të përfundojë menjëherë”, ndryshe nga deklaratat e mëparshme të Trumpit.
Sipas gazetës, ndihma e drejtpërdrejtë ushtarake amerikane pritet të reduktohet pothuajse përgjysmë, përmes shkurtimit të periudhës së zakonshme 10-vjeçare në pesë vjet, pas përfundimit të marrëveshjes aktuale në vitin 2028.
Pas kësaj periudhe pesëvjeçare, ndihma e drejtpërdrejtë ushtarake amerikane pritet të ndërpritet plotësisht, shtoi gazeta.
Në të njëjtën kohë, Uashingtoni pritet të rrisë financimin për zhvillimin e përbashkët të sistemeve të mbrojtjes ajrore dhe raketore, nga niveli aktual prej 500 milionë dollarësh në vit në një shumë që ende nuk është bërë e ditur, sipas raportimit.
Administratat e njëpasnjëshme amerikane i kanë ofruar Izraelit mbështetje të gjerë ushtarake, financiare dhe politike.
Washingtoni ka vazhduar të jetë një nga mbështetësit kryesorë ushtarakë dhe diplomatikë të Izraelit gjatë asaj që burimi e cilëson si gjenocid në Gaza, që nga tetori i vitit 2023.
