Ministri turk i Energjisë dhe i Burimeve Natyrore, Alparslan Bayraktar, bëri thirrje për më shumë investime dhe bashkëpunim më të ngushtë ndërkombëtar në fushën e energjisë, duke thënë se Türkiye është e gatshme të ndihmojë në forcimin e sigurisë energjetike në gjithë rajonin.

"Bota nuk ka nevojë për më shumë pasiguri në fushën e energjisë. Kemi mjaftueshëm. Ajo ka nevojë për më shumë bashkëpunim, më shumë investime dhe partneritete më të besueshme", tha Bayraktar në Forumin e 19-të Ekonomik Euroaziatik të Veronës, në Stamboll.

Forumi u mbajt me mbështetjen e Shoqatës së Industrialistëve dhe Biznesmenëve të Pavarur (MUSIAD) dhe Universitetit Ibn Haldun me seli në Stamboll.

Bayraktar tha se përpjekjet e Türkiyes për ta përmirësuar sigurinë e saj energjetike janë pjesë e një synimi më të gjerë rajonal.

"Synimi ynë nuk është vetëm të forcojmë sigurinë energjetike të Türkiyes, por edhe të kontribuojmë në krijimin e një rajoni më të ndërlidhur, më të qëndrueshëm dhe më të begatë", tha ai.

Ai tha se Türkiye shpreson ta përcjellë këtë qasje edhe në bisedimet globale për klimën, kur muajin e ardhshëm do të presë konferencën COP31 në Antalya.

"E ardhmja e energjisë nuk do të përcaktohet nga vendet që veprojnë të vetme", tha Bayraktar, duke shtuar: "Ajo do të përcaktohet nga vendet që punojnë së bashku".

- Türkiye dhe Kanadaja diskutojnë projekte të përbashkëta energjetike

Më herët gjatë ditës, Bayraktar u takua me ministrin kanadez të Energjisë dhe të Burimeve Natyrore, Tim Hodgson, kryetarin e Bordit për Marrëdhënie Ekonomike me Jashtë të Türkiyes (DEIK), Nail Olpak, si dhe përfaqësues të komunitetit të biznesit turk, në tryezën e rrumbullakët për bashkëpunimin energjetik Türkiye-Kanada, në Stamboll.

Në një postim në platformën turke të mediave sociale NSosyal, Bayraktar tha se ai dhe Hodgson diskutuan për shndërrimin e partneritetit strategjik energjetik mes Türkiyes dhe Kanadasë në projekte konkrete, në fusha që përfshijnë energjinë bërthamore, furnizimin me gaz natyror të lëngshëm (LNG), mineralet kritike dhe energjinë e rinovueshme.

Diskutimet u zhvilluan pas nënshkrimit të një deklarate të përbashkët për bashkëpunimin energjetik, një ditë më parë, në prani të presidentit Recep Tayyip Erdoğan dhe kryeministrit kanadez Mark Carney.

Türkiye dhe Kanadaja nënshkruan të enjten tri marrëveshje për industrinë e mbrojtjes, transportin ajror dhe bashkëpunimin energjetik.