Kryeministri francez, Sebastien Lecornu, njoftoi sot rritjen me 1,6 për qind të pagës minimale dhe masa për mbështetjen e fuqisë blerëse ndërsa mobilizimi shoqëror vazhdon në mbarë vendin.
Rritja e pagës minimale, e njoftuar nga ministri i Punës, Jean-Pierre Farandou, do të hyjë në fuqi më 1 dhjetor, duke e çuar pagën minimale mujore neto në 1.502 euro. Lecornu e cilësoi rritjen prej 1,6 për qind si të dytën më të madhe në Francë gjatë 20 viteve të fundit, duke theksuar se ajo "nuk është thjesht simbolike".
Ai argumentoi se një rritje më e madhe do të shkaktonte humbje të konsiderueshme të vendeve të punës afatgjate.
Lecornu tha se qeveria do të përdorë në afatshkurtër të gjitha mekanizmat në dispozicion për të trajtuar shqetësimet lidhur me fuqinë blerëse. Këto përfshijnë bonuset e lidhura me energjinë, rritjen e kufirit të kompensimit pa tatim për orët shtesë të punës dhe përjashtimet tatimore për bonuset e ndarjes së fitimit.
Qeveria planifikon të paraqesë amendamente në projektligjin e buxhetit për vitin 2027, me qëllim zbatimin e këtyre masave.
- Kufiri prej 1.000 eurosh për kompensimin e karburantit
Ministri i Ekonomisë dhe i Financave, Roland Lescure, tha se qeveria do të propozojë një amendament për të ruajtur në vitin 2027 kufirin prej 1.000 eurosh për kompensimin e karburantit për punonjësit. Ai tha se vitin e kaluar, në përgjigje të krizës në Ngushticën e Hormuzit, ky kufi ishte rritur nga 300 në 1.000 euro.
"Duam të kufizojmë pasiguritë lidhur me inflacionin dhe fuqinë blerëse", tha Lescure. Ai tha se nuk beson më në njoftimet që nuk shoqërohen me rezultate konkrete, duke përmendur si shembull lirimin e 10 milionë fuçive naftë dizel, një masë që mund të sjellë rezultate të prekshme.
"Rritja e pagës minimale nuk është e mjaftueshme, por ka një përfitim të madh: ajo hap një cikël diskutimesh për rritjen e pagave", tha Lecornu duke shtuar se në ditët në vijim një komitet për monitorimin e pagave do të takohet me sindikatat dhe punëdhënësit.
"Ekzistojnë shqetësime për të ardhmen... po shfaqen tensione. Ka çështje sociale të cilat qeveria duhet t'i trajtojë", tha ai. Një javë e re mobilizimi shoqëror nisi të hënën, me një konferencë sociale të organizuar nga zyra e Lecornu-s, ku morën pjesë sindikatat dhe organizatat e punëdhënësve.
- Priten greva të tjera
Disa sindikata dhe përfaqësues të të rinjve, të cilët nuk ishin ftuar në konferencë, kanë bërë thirrje për grevë dhe protesta të martën. Sipas Ministrisë së Arsimit, sot deri në orën 09:30 sipas kohës lokale, 31 shkolla të mesme në Francë ishin bllokuar. Kjo përfaqëson 0,8 për qind të rreth 3.700 shkollave të mesme në vend, raportoi televizioni BFM.
Ministria tha se në pothuajse tri të katërtat e departamenteve të vendit nuk ishin raportuar ndërprerje të procesit mësimor. Në rajonin Ile-de-France, sipas autoriteteve rajonale, ishin shënuar ndërprerje në 50 shkolla të mesme. Autoritetet thanë se shumë përpjekje për bllokimin e shkollave ishin parandaluar nga policia ose personeli shkollor.
Autoritetet raportuan rreth 30 incidente me fishekzjarrë mortajë, rreth 10 prej të cilave brenda ambienteve shkollore. Ato njoftuan se do të paraqesin kallëzime për dëmet e shkaktuara gjatë fundjavës në tri shkolla të mesme, përfshirë një portë të dëmtuar, një hyrje të paautorizuar të pasuar nga një zjarr dhe mbishkrime në mure.
