Futbollisti kosovar, Florent Hadërgjonaj i cili luan për Corendon Alanyaspor në Trendyol Super League, tha se nëse janë në nivelin e tyre më të mirë, veçanërisht në aspektin e përqendrimit, mund të shkaktojnë probleme për Türkiyen në ndeshjen e nesërme.

Mbrojtësi i djathtë 31-vjeçar tha se Türkiye ka lojtarë cilësorë dhe shumë të vlefshëm.

"Nuk do të jetë ndeshje e lehtë, por rezultati është gjithmonë 50-50 dhe ky është avantazhi ynë. Ne do të luajmë në Prishtinë, në fushën tonë, para tifozëve tanë. Ky është një plus për ne, por në fund të fundit, duhet ta tregojmë në fushë. Türkiye ka lojtarë shumë të mirë që mund ta ndryshojnë ndeshjen në një sekondë, në një çast. Duhet të jemi vërtet të kujdesshëm. Sidomos nëse jemi në nivelin tonë më të mirë për sa i përket përqendrimit, mendoj se mund t'u shkaktojmë vërtet probleme", tha Hadërgjonaj.

Hadërgjonaj tha se ata do të luajnë një ndeshje historike dhe shumë të rëndësishme për ta. 

“Atmosfera në ekip është fantastike. Ne kemi vërtet një grup shumë të mirë lojtarësh. Mendoj se mund ta shihni këtë në fushë, si luftojmë për njëri-tjetrin. Nuk ka rëndësi kush luan dhe kush jo. Sigurisht, unë jam një nga lojtarët më me përvojë në ekip. Po përpiqemi ta mbajmë ekipin të bashkuar, të gjithë po bëjnë mirë", u shpreh futbollisti kosovar.

Futbollisti me përvojë tha se arritja në finalen e "play-off"-it nuk ishte surprizë. 

"Ne ishim shumë të mirë në kualifikueset dhe në gjysmëfinalen e 'play-off'-it. Sigurisht, gjithmonë ka presion, por mendoj se presioni do të jetë më shumë nga ana turke. Për ne, kjo do të jetë një ëndërr dhe po përpiqemi ta kthejmë këtë presion pozitiv në avantazhin tonë për të treguar se vërtet mund të arrijmë diçka", theksoi Hadërgjonaj.

"Tani po i tregojmë të gjithë botës se mund të na besojnë. Sepse askush nuk na besonte vërtet. Ishim në një grup të vështirë në fazën e grupeve, na u desh ta kapërcenim dhe ia dolëm. Kishte edhe një ndeshje të vështirë jashtë fushe në gjysmëfinale. Dhe tani jemi plotësisht të përqendruar në këtë finale, të cilën do ta luajmë në Prishtinë para tifozëve tanë. Nëse kapaciteti i stadiumit do të ishte 100 mijë, biletat do të ishin shitur tashmë pasi të gjithë duan ta shikojnë këtë ndeshje".

Duke iu referuar marrëdhënieve mes dy vendeve ai tha: "Kjo e bën ndeshjen edhe më të veçantë. Nëse kundërshtari do të ishte një ekip tjetër, ndoshta do të ishte pak më ndryshe. Kam jetuar dhe luajtur në Türkiye për gjashtë vjet dhe tani kemi një ndeshje finale kundër Türkiyes. Kjo është diçka vërtet e veçantë për mua dhe familjen time. Të dy fëmijët e mi kanë lindur në Türkiye dhe për ne, Türkiye është si një shtëpi e dytë, gjë që e bën ndeshjen të veçantë".

"Por, në fund të fundit, unë luaj për kombëtaren e Kosovës, kështu që përpiqem ta bëj vendin tonë krenar. Sepse mendoj se kjo mundësi nuk do të vijë shumë shpesh dhe njerëzit tanë mezi presin këtë ndeshje. Dhe sigurisht, Türkiye është një vend i veçantë. Marrëdhënia midis Türkiyes dhe Kosovës është vërtet e mirë. Njerëzit, kultura, ushqimi dhe gjithçka, përveç gjuhës, është shumë e ngjashme", tha Hadërgjonaj.

Hadërgjonaj, i cili ka luajtur për klubet turke Kasimpasa dhe Alanyaspor që nga viti 2019, është paraqitur në 194 ndeshje në Trendyol Super Lig.