Një i dërguar i lartë i presidentit amerikan, Donald Trump, ka propozuar që Italia të zëvendësojë Iranin në Kupën e ardhshme të Botës, FIFA, sipas një raporti.
Propozimi shihet si pjesë e një përpjekjeje për të riparuar marrëdhëniet e tensionuara mes Trumpit dhe kryeministres italiane, Giorgia Meloni, pas një përplasjeje të fundit lidhur me kritikat e presidentit ndaj Papa Leon XIV për luftën me Iranin, raportoi Financial Times të mërkurën, duke cituar burime të njohura me çështjen.
“Konfirmoj se i kam sugjeruar Trumpit dhe (presidentit të FIFA-s Gianni) Infantino që Italia të zëvendësojë Iranin në Kupën e Botës. Jam me origjinë italiane dhe do të ishte një ëndërr të shihja ‘Azzurrët’ (kombëtaren italiane) në një turne të organizuar në ShBA. Me katër tituj, ata kanë historinë që justifikon përfshirjen”, tha i dërguari special amerikan Paolo Zampolli për FT.
Ndërkohë, Irani është plotësisht i përgatitur për pjesëmarrjen e ekipit të tij kombëtar në Kupën e Botës FIFA 2026 në Shtetet e Bashkuara, tha të mërkurën zëdhënësja e qeverisë, Fatemeh Mohajerani.
Duke folur për transmetuesin shtetëror IRIB, Mohajerani tha se Ministria e Rinisë dhe Sporteve ka siguruar të gjitha përgatitjet e nevojshme për pjesëmarrjen efektive të ekipit në turne.
“Irani po vjen”
Edhe pse FIFA nuk ka komentuar mbi përpjekjen e raportuar të lobimit, Infantino tha javën e kaluar se ekipi iranian pritet të marrë pjesë.
“Ekipi iranian po vjen, pa dyshim”, tha ai në një konferencë në Uashington, DC.
Më herët, Meksika konfirmoi se FIFA ka refuzuar të riplanifikojë ndeshjet e Iranit në vendin fqinj jugor të ShBA-së.
Irani kishte kërkuar zhvendosjen e ndeshjeve në Meksikë në sfondin e luftës ShBA-Izrael.
Irani është planifikuar të luajë të gjitha ndeshjet e Grupit G, përfshirë ndaj Belgjikës, Egjiptit dhe Zelandës së Re, në ShBA.
Sipas kalendarit të ekipit në faqen e FIFA-s, Irani do të përballet me Zelandën e Re më 15 qershor në stadiumin e Los Anxhelosit, me Belgjikën më 21 qershor në të njëjtin stadium, dhe me Egjiptin më 26 qershor në stadiumin e Siatllit.
