Forcat qeveritare të Jemenit thanë të enjten se 1.370 luftëtarë të grupit Huthi janë “neutralizuar” në 1.729 sulme të kryera në kuadër të operacionit ushtarak “Agimi i Jemenit”.

Në një deklaratë, forcat thanë se sulmet kishin në shënjestër pika të vëzhgimit të Huthive, qendra të komandës dhe kontrollit në vijën e frontit, depo të armëve, pika të furnizimit, përforcime dhe pozicione ushtarake në disa fronte.

Në deklaratë thuhet se gjatë operacioneve janë përdorur “armë moderne të avancuara”, ndërsa janë shkatërruar ose dëmtuar 300 automjete ushtarake, pajisje dhe mjete të tjera.

Shifrat nuk mund të verifikoheshin në mënyrë të pavarur.

Kryetari i Këshillit Presidencial të Jemenit, Rashad al-Alimi, njoftoi të hënën nisjen e operacionit “Agimi i Jemenit”, duke thënë se ai e synon rivendosjen e institucioneve shtetërore, rimarrjen e kryeqytetit Sana dhe përfundimin e kontrollit të Huthive.

Që atëherë, forcat qeveritare kanë njoftuar përparime në jugperëndim të Jemenit, përfshirë në zonat përreth Ngushticës strategjike Bab el-Mandeb.

Koalicioni i udhëhequr nga Arabia Saudite, i cili mbështet qeverinë e njohur ndërkombëtarisht të Jemenit, tha se 100 avionë luftarakë kanë marrë pjesë në operacionet kundër pozicioneve të Huthive.

Ofensiva u zhvillua në një kohë kur në Jemen janë intensifikuar sërish luftimet pas përparimit të Huthive në shtator, përfshirë marrjen e qytetit port strategjik Mokha dhe ishullit Mayyun në Ngushticën Bab el-Mandeb.

Jemeni është përfshirë në konflikt që nga shtatori i vitit 2014, kur Huthit e morën kontrollin e kryeqytetit Sana, duke nxitur koalicionin e udhëhequr nga Arabia Saudite të ndërhynte në mars të vitit 2015 në mbështetje të qeverisë së njohur ndërkombëtarisht.