Sekretari amerikan i Shtetit, Marco Rubio, tha të martën se Uashingtoni mund të rishqyrtojë vlerën e aleancës së NATO-s pas luftës me Iranin, duke përmendur zhgënjimin në rritje me hezitimin e aleatëve për të mbështetur fushatën ushtarake amerikane.

“Pas përfundimit të këtij konflikti, do të duhet ta rishqyrtojmë atë marrëdhënie. Do të duhet të rishqyrtojmë vlerën e NATO-s dhe të asaj aleance për vendin tonë”,  tha Rubio gjatë një interviste për FOX News.

“Në fund, kjo është një vendimmarrje që i takon presidentit”, shtoi ai.

Ai kritikoi aleatët e NATO-s për refuzimin e kërkesave të ShBA-së për përdorimin e bazave ushtarake, duke thënë: “Nuk po u kërkojmë të kryejnë sulme ajrore. Kur kemi nevojë që ata të na lejojnë të përdorim bazat e tyre ushtarake, përgjigjja e tyre është ‘Jo’. Atëherë pse jemi në NATO?”

Rubio, i cili tha se për një kohë të gjatë ka qenë “një nga mbrojtësit më të fortë të NATO-s”, theksoi se aleanca i ka lejuar ShBA-së të projektojë fuqinë e saj globalisht përmes bazave në Evropë.

Por ai paralajmëroi se aleanca rrezikon të bëhet “një rrugë njëkahëshe”.

“Pse i kemi… të gjitha këto forca amerikane të stacionuara në rajon nëse, në momentin kur kemi nevojë, nuk do të na lejohet të përdorim ato baza?” tha ai.

Komentet e tij vijnë në një kohë kur disa aleatë evropianë kanë refuzuar ose kufizuar kërkesat e ShBA-së lidhur me luftën me Iranin, duke përfshirë mohimin e qasjes në baza dhe hapësirë ajrore, për shkak të shqetësimeve mbi ligjshmërinë e luftës dhe mungesën e konsultimit me NATO-n.

Italia së fundmi refuzoi një kërkesë të ShBA-së që avionët të uleshin në një bazë ushtarake në Siçili, ndërsa Spanja ka refuzuar të autorizojë përdorimin e bazave ose hapësirës së saj ajrore për operacione të lidhura me luftën. Aleatë të tjerë, përfshirë Mbretërinë e Bashkuar, Francën dhe Gjermaninë, e kanë kufizuar rolin e tyre në mbështetje mbrojtëse për partnerët rajonalë dhe kanë bërë vazhdimisht thirrje për ulje të tensioneve.