Gjatë 24 orëve të fundit në Shqipëri janë raportuar 25 vatra zjarri në vend, pjesa më e madhe e të cilave janë shuar. Aktualisht, pesë vatra vijojnë të jenë aktive, ndërsa një zonë tjetër mbahet nën monitorim.‘

Ministria e Mbrojtjes e Shqipërisë njoftoi se 365 forca operacionale me 37 automjete zjarrfikëse janë angazhuar në terren për përballimin e vatrave të zjarrit, ndërsa në mbështetje të tyre kanë vepruar 158 efektivë të Forcave të Armatosura me 10 mjete dhe katër helikopterë të Forcës Ajrore.

Në Krujë vijon operacioni në zonat Abaze dhe Krastë–Halil. Ndërhyrja nga ajri me helikopterë ka frenuar përhapjen e zjarrit dhe aktualisht nuk raportohet rrezik për zonat e banuara.

Agjencia Kombëtare e Mbrojtjes Civile dhe strukturat e Mbrojtjes Civile vijojnë të jenë në gatishmëri dhe të koordinojnë operacionet në terren deri në neutralizimin e plotë të vatrave aktive.