Dhjetëra aktivistë të së djathtës ekstreme në Izrael protestuan të mërkurën në mbrëmje para shtëpisë së prindërve të regjisores së filmit “Naza”, Rachel Tzur, në qytetin Savyon të Izraelit qendror, raportuan mediat lokale, transmeton Anadolu. 

Protestuesit brohoritën slogane, përfshirë “dënim me vdekje për tradhtarët”, sipas uebsajtit të lajmeve Walla.

Filmi “Naza”, i cili të shtunën fitoi Çmimin Special të Jurisë në Festivalin Ndërkombëtar të Filmit në Venecia, shfaq dëshmi të oficerëve dhe ushtarëve izraelitë për krime  lufte gjatë luftës së Izraelit në Gaza.

Walla raportoi se protestuesit u mblodhën para shtëpisë së prindërve të Tzur për ta dënuar atë dhe bashkëregjisorin Yuval Abraham, ndërsa disa prej tyre i akuzuan regjisorët se i paraqesin ushtarët izraelitë para botës si “vrasës”.

- Aktivistë të lidhur me partinë e Ben-Gvirit

Gazeta Israel Hayom, duke cituar burime anonime, raportoi se organizatorët e protestës dhe shumë prej pjesëmarrësve ishin aktivistë dhe anëtarë të stafit të fushatës të lidhur me partinë Fuqia Hebraike, të drejtuar nga ministri i Sigurisë Kombëtare i së djathtës ekstreme, Itamar Ben-Gvir.

Gazeta tha se mesazhet e shpërndara në rrjetet sociale para protestës përmbanin thirrje të drejtpërdrejta për dhunë.

Protesta u zhvillua pak pasi kryeministri izraelit Benjamin Netanyahu tha se do të çojë përpara dy projektligje që synojnë personat që ai i akuzoi për shpifje ndaj ushtarëve izraelitë, deklarata që i referoheshin pjesërisht dokumentarit “Naza”.

Shefi i ushtrisë izraelite, Eyal Zamir, të hënën urdhëroi prokurorin ushtarak të shqyrtojë mundësinë e ndërmarrjes së veprimeve ligjore ndaj regjisorëve, ndërsa ministri i Kulturës dhe Sportit, Miki Zohar, të mërkurën i kërkoi shefit të Shin Bet-it, David Zini, të nisë një hetim urgjent për dokumentarin, sipas mediave izraelite.

Filmi, me regji të regjisorëve izraelitë fitues të çmimit Oscar, Abraham dhe Tzur, përfshin dëshmi të pjesëtarëve të ushtrisë izraelite, të cilët kanë thënë se kanë parë veprime në Gaza, përfshirë djegien e zonave të banuara të përdorura si strehimore dhe vrasjen e njerëzve gjatë shpërndarjes së ushqimit.

“Naza” është një akronim që përdoret nga inteligjenca ushtarake izraelite për t’iu referuar numrit të civilëve që pritet të vriten gjatë një sulmi ajror, sipas regjisorëve.